Madridan ilmastokerähmö piätyi huonoh kompromissah

Ilmastokokous Madrid 2019

YK:n ilmastokerähmö Madridas suadih piätökseh. Kerähmö piätyi kompromissah, da monii tärgielöi kyzymyksii siirretäh. Kerähmös piätettih, ku ozanottajat tuvvah pluanat uuzis piästövähendyksis Glasgowan kerähmöh vuvvennu 2020.

 
Piämiäränny on salvata kuiluu nygytilandehen da niilöin piästövähendyksien välil, kudamat tutkijoin mugah ollah vältämättömät, ku ei ilmastonmuutos ravenis haldivoičemattomakse 2030-luvul, sanelou BBC.

 
Sobimukses ”annetah julgi kiirehelline tarveh” uuzih piästövähendyksih, ku lämbenemine suadas jiämäh alle kahten gruadusin, saneli kerähmyö ižändöinnyh Ispanii.

 
”Suuret muat pageiltih omua vastuttu”
Ymbäristöjärjestön WWF:n mugah kerähmö piätyi fiaskoh, kudamas suuret lijastuttaimuat ei pietty niminny rahvahien huoldu ilmastos.

 
‒ Suuret lijastuttaimuat enäm ei voija olla välinpitämättömät, ku ilmastohädätila varaittau rahvahien hyvinvoindua kaikkiel muailmas. Paiči Europan Liittuo ei ni yksi lijastuttaimualois reagiiruinnuh dieloh, hos se oli kiirehelline. Hyö vaiku pageiltih omua vastuttu. Enne kaikkie Australii, Brazilii, Indii, Kitai, Saudi-Arabii, Ven’a da Yhtysvallat syvettih piätöksien hillendämizeh, sanou WWF:n ilmastoazientundii Mia Rahunen.

 
WWF:n mugah valdivot ei sežo piästy sobuh Parisan ilmastosobimuksen siändökirjan jälgimäzes kohtas libo markinmehanizmoin čotaičendu- da raportuičendusiändölöis. Rahvahienvälizile hiilimarkinoile tarvitah yhtehizet, lujat kižasiännöt, ku kauppu toven vähendäy piästölöi.

 
‒ Piätöksen pitkästymine on nygöi parem vaihtoehto kui se, ku muat oldas hyväksytty huonot siännöt, kudamien muuttamine myöhembä on läs mahtotoi dielo. Olemmo ylen tyydyväzet, ku Europan Liitto puolisti rohkieh ilmastoruandoin uskottavuttu. Europan Liitto sežo vuadi ymbäristötavoittehien da socializen zakonanmugazuon turvuamistu”, kiittäy Rahunen.

 
Lähteh: Keskisuomalainen
Fotokuva: Keskisuomalainen / Lehtikuva / AFP

Vastaa

Sähköpostiosoitettasi ei julkaista. Pakolliset kentät on merkitty *