Milla Tynnyrinen on opastunnuh karjalan kieleh Karjalazen luvendukodvazen vuoh

Mennyt nedälil Karjalan kielen seuru sai ylen hyvän sähköpoštuviestin Milla Tynnyrizelpäi. Milla otti ozua Karjalazeh luvendukodvazeh da oli enzimäine, ken suoritti sen. Milla saneli, gu häi on opastunnuh lugemah da kirjuttamah karjalakse juuri luvendukodvazen vuoh! Hänen sanelendu oli moine mieldykiinnittäi, ga myö kai kerras piätimmö pagizutella händy täh dieloh näh sähköpoštači. Nenga sit Milla meile vastai karjalakse:

”Passibo luvendukodvazes, oli ylen vessel lugie karjalakse!

Olen Milla Tynnyrinen, minule roih terväh 22 vuottu da roindua myöte olen Siilinjärvespäi. Nygöi elän Tamperes i opastun yliopistos anglien kieleh. ”Aiguhizennu” minus tahtottavalleh tulou kiändäi. Suvaičen enne kaikkie kaunehkirjallistu kiändämisty. Olen opastui, ga en opastu yliopistos karjalan kieleh. Tahtozin kävvä sežo karjalan kursiloil, ga minun yliopistos ei moizii ole.

On äijy syydy, mindäh suvaičen karjalan kieldy. Karjalan kieli ezmäi rubei interesuimah minuu mondu vuottu tagaperin, ku minun muaman muamo da tuatan tuatto oldih rodužin Salmispäi da minun suvus on aijembah paistu (yhtelläh kuitah) karjalakse. Esimerkikse minun muamo on sanonuh, što häigi vähäzen lapsennu pagizi karjalakse, ga ei toinah enämbiä musta. Minun mieles kai karjalan kielen paginluavut ollah ylen čomat, da on tärgei dielo, što karjalan kieli ei piäze unohtumah. Duumaičen, on ylen hyvä, što nygöi voibi tämängi linnan bibliotiekas löydiä äijän kniigua karjalakse.

Olin jo hätken tahtonuh opastuo karjalan kieleh, ga en tiedänyh, kuibo sen ruadazin. Vaste täl sygyzyl lövvin internetas Karjalazen luvendukodvazen i duumaičin, što tai olis minule pädii dielo. Sit menin bibliotiekkah da ečiin mondu kniigua karjalakse da luvin net kai. Ezmäi lugemine oli ylen vaigei ruado i en ellendännyh nimidä, ga ozakse lövvin internetas sežo Raija Pyölin luajitun Karjal–suomi-sanakniigan. Vähin-vähäzin lövvin uuzii sanazii i nygöi en puaksuh tarviče sanakniigua, konzu luven (ga tarvičen vie, konzu kirjutan).

En vie hyvin malta paista, ga opin joga päiviä vähäzen kirjuttua Vidžerdäih (Twitter) minun argidieloi. Ainos vai pagižen sie minun kažilois i kirjutan, midä murginua luajin! Ližäkse tunnen internetas monii nuorii karjalazii, kudamat paistah karjalakse minunke – libo hyö paistah da minä luven i kuundelen. Hyö ollah ylen ystävällizet da ainos avvutetah minuu, konzu en tiijä midätah sanua karjalakse. Terväh minägi pagizen iäneh karjalakse, hos vie varaittaugi!” 

Milla Tynnyrinen
Kuvas: Milla Tynnyrinen

Karjalan kielen seuru da Karjal Žurnualu passiboijah Millua pagizuttelus da hyvitelläh Karjalazen luvendukodvazen suoritandas! Kaikkie hyviä da lykkyy Millale tulieh karjalan kielen opastundah!

Karjalaine Luvendukodvaine kestäy  15.12.2019 sah, da sinägi vie ihan hyvin ehtit yhtyö sih! Luvendukodvazen tavoittehennu on lugie 10 karjalankielisty kniigua, kuduat on tarkembah miäritelty karjalazen luvendukodvazen sivuloil avvonazes verkokirjastos:
https://www.karjal.fi/avoinkirjasto/karjalainen-verkkokirjasto/karjalaine-luvendukodvaine/

Yhty Karjalazeh luvendukodvazeh, da  lopputulos  voibi ylen ihastuttua sinuu da tuvva iložan s’urpriizan!

Pagizutteluvuitin kirjutannuh karjalakse: Milla Tynnyrinen
Kirjutuksen luadinuh Heini Karjalainen da kiändänyh Natalia Giloeva
Kuva: Milla Tynnyrinen

Vastaa

Sähköpostiosoitettasi ei julkaista. Pakolliset kentät on merkitty *