Saudi-Arabiessa on ruvettu andamah naizilla pasporttoi ilmain miespuolizelda huolenpidäjäldä kyzyttyö lubua

Saudi-Arabien hallinnon lehtih, ministerstvoin verkkosivuloilla da rahvahienvälizih uudizih tuli männyön kuun allussa tiedo siidä, jotta naizien ičenmiäriämisoigevuot lizetäh sygyzyn aigah kuningahan annetulla azetuksella.

Oigevus pasportan suandah koskou täyzi-igähizie 21-vuodehizie naizie. Lizäksi naine voi registriiruija miehen kera yhtehmänennän, eruonnan da lapsen synnynnän.

Lapsien enzisijahizet huolenpidäjät, muamot voijah i tilata omilla lapsilla dokumenttoi matkua näh da andua heilä luvan matkah.

Matkuamisrajotuksie vällennettih i alla 21-vuodehizilda naizilda, kumbazet ollah mändy miehellä, opassutah ulgomualla halličuksen annetun stipendien avulla libo ruatah ulgomualla da suahah palkkua valdivolda.

Ongo muutoksella vaikutusta naizien eländäh?

Yhelläh miehen azema naizen huolenpidäjänä pyzyy endizelläh. Naizen opastumine, miehellä mänendä, ruadamine da ezimerkiksi dengoin käyttämine iellähgi ollah huolenpidäjän vallassa.

– Tämä iellähgi andau mahollizuon valvuo i täyzi-igähizen naizen liikkumista, arvivoiččou rištikanzanoigevusjärjestö Human Rights Watch.

Järjessön mugah miespuoline huolenpidäjä voi uuvissuksien jälgehgi vielä viijä naizelda suuvossa oigevuon matkoih.

Helsingin yliopisson semiläzien kielien da kulttuuroin professora Hannu Juusola muissuttau, jotta oigevuskäytännöt ei olla yhtenäzet Saudi-Arabiessa.

– Zakonoin pygälissä on ristariidua, niidä sellitetäh vieron kautti da yhen ainavon sud’d’angi valda voibi olla suuri, sanou Juusola.

Saudi-Arabiessa perehellä on tärgie azema. Vuitilla perehistä on vällä muailmankačondataba. Hyö ollah suadu opassusta toizissa mualoissa da hyö kannatetah taza-arvuo. Zakonanmuutokset ei välttämättä tuuva heijän eländäh suurda muutosta.

A niissä perehissä, kumbazissa muailmua kačotah jyrkkäh vieron kautti da heimon perindehet ollah lujat da kumbazissa ruatah naizilla pahua, muutokset ei kevennetä naizien eländiä.

Matkuamisoigevutta da toizie, aiguhizie naizie koskijoi virrallizie dieloloi, kumbazie prinsipassa on vällennetty, lopulla testiiruijahgi käytännössä da muan eri alovehilla.

Riyadh, Saudi Arabia

Kiännös: Katerina Paalamo
Kuva: G. Mantchorov, Pixabay
Lähteh: https://yle.fi/uutiset/3-10946281

Vastaa

Sähköpostiosoitettasi ei julkaista. Pakolliset kentät on merkitty *