Meteorologin n’euvo: Kačahuš mopikašta taivašta kohti

Koko netälin ajan on lyhytaikasie kuatovihmoja, ka niijen tarkka einuššuš on nyt vaikieta. Lämpötilat ollah mielusan kešäsie.
Šuomi on koko netälin matalan painon koprissa. On luvašša toisinah kuatovihmoja ta ukkoistaki ympärihis muata.
– Vaikka meilä on lyhytaikasie kuatovihmoja ta paikotellen ukkoni jyräjäy, ni päiväistäki niämmä, lauhuttau Ylen meteorologi Seija Paasonen.
Ilmamassa on niin lämmintä, jotta Šuvi- ta Keški-Šuomešša lämpömittari voipi noušša vielä 20 ašteheh. Lapissa päivällä on 15 aštehen molommin puolin.

Konša kuatovihmat ollah lyhytaikasie, niijen tarkka einuššuš on vaikieta tietokonehellaki. Lyhytaikasie kuatovihmoja voipi olla paikottain niin, jotta nuapurikyläššä vihmuu, a omašša ei. Moni kaččou šiäeinuššušta mopikašta paikkakuntakohtasešti, ka vain še ei tällä netälillä ole järkövyä.
– Mopikan pistehkohtaset einuššukšet voijah ollah tosi petollisie. Šemmosissa lyhytaikasissa šiätilantehissa kannattau noštua šilmät mopikašta ta kaččuo taivašta šekä yleiskarttua. Još taivahalla on korkeita pilvijä, lyhytaikaset kuatovihmat ollah mahollisie ta vihma voipi alkua.

Taivahalla kaččomista näinä päivinä on šuosittava šentähki, jotta nyt voipi nähä persidijen lentotähtiparvija. Niijen huomuamini vuatiu kuiteski pimietä. Tämän takie ei välttämättä tähenlentoja nähä Lapissa.

Yöt ollah lämpimie, ei pelkuo hallašta

– Onnekši hallaöistä ei ole nyt pelkuo. Meilä on lämpimät, koštiehkot yöt, ta tulou šumuja. Nuo näytetäh komeilta illalla, konsa rupieu viluštumah. Huomenekšillaki niitä on vielä.
Paasosen mukah päivälämpötilat ollah ottaen huomijoh ajan keškimiäräsie. Yöt ollah vähäsen lämpimämpieki. Loppunetälistä ilmamassa vähäsen viluštuu, ka šilloinki lämpötila voipi missänih piäššä 20 ašteheh. Lyhytaikasie kuatovihmoja on tovennäkösešti luvašša netälinloppunaki.

Kuva: Joona Kotilainen
Kuva: Joona Kotilainen

Lähteh: https://yle.fi/uutiset/3-10918385
Kiännöš: Irma Aleksejeva
Kuva: Joona Kotilainen / Markkinointitoimisto Tovari

Vastaa

Sähköpostiosoitettasi ei julkaista. Pakolliset kentät on merkitty *