Unicef: Tuhanzie vierasvojuiččijoin lapsie eläy ylen pahoissa ololoissa Siiriessä da Irakassa

Tuhanzie vierasvojuiččijoin lapsie eläy hirveissä ololoissa luageriloissa, säilöhotandakessuksissa da armottomienkodiloissa Siiriessä da Irakassa, arvivoiččou YK:n lapsienjärjestö Unicef. Järjessön mugah lapsien hengine da fiizine hyvinvoinda ollah varattavat.

Suurin vuitti lapsista on järjessön mugah syndyn laidajärjestö Isisan hallittuloilla alovehilla libo matkannun sinne omien vanhembien kera.

Unicef čotaiččou, jotta Siiriessä eläy lässä 29 000 ulgomualaista lasta. Suurin vuitti heistä libo 20 000 on susiedamuasta Irakasta, da enämbi 9 000 lasta on 60 muusta muasta.

Vielä ussotah, jotta heijän lizäksi nenga tuhannen vierasvojuiččijan lapset ollah Irakassa.

Unicefan piäjohtaja Henrietta Fore sanou järjessön tiijottehessa, jotta lapset ollah kahičči hyllätyt.

–  Heijän omat yhtehizöt syrjitäh heidä, da nyt i valdivot muga ruatah. Lapsilla pidäis suaha peruspalveluloi da piässä järelläh omah muah.

Al-Holan luageri
Kuvas: Vaibunuot perehet oldih monda päiviä matkattu ennen Al-Holan luagerih Pohjakoilis-Siirieh tulendua vuuven allussa. Emmä voi tovestua, jotta kuvassa olijat hengilöt oldais otettu ozua Isis-järjessön toimindah. © Unicef/ Siirie 2019/ Delil Souleiman.

Järjestö on auttan 270 lapsen kodiudumista

Järjestö muissuttau, jotta YK:n lapsien oigeuksien sobimus sidou valdivoloi vardeiččemah jogahista alla 18-vuodehista lasta.

Suomen Unicefan programmajohtaja Inka Hetemäki sanou tiijottehessa, jotta Suomella on kaikki mahto pidiä huolda lähemmäksi kolmestakymmenestä suomelazen vierasvojuiččijan lapsesta.

–  Meilä lapsiensuojelu hyvin ruadau, da konza pidäy, meilä ollah i mehanizmat kovih keinoloih, toizin sanoin lapsen huostahotandah. Suomessa on erillistä hoiduo dai voinan täh trauman suanuzilla lapsilla.

Unicefan mugah järjestö on täh suaten auttan 270 lapsen kodiudumista. Abuh on järjessön mugah kuulun yhtehisruado ministerstvoin da konsulstvoin kera, zakonalline abu, lapsien suattamine omih mualoih da sobeuttamine heijän omih perehyhtehizölöih.

Kiännös: Katerina Paalamo
Lähteh: Karjalainen
Kuva: © Unicef / Siirie 2019/ Delil Souleiman

Vastaa

Sähköpostiosoitettasi ei julkaista. Pakolliset kentät on merkitty *