Suomen pravoslaunoi kirikkö on suanun enzimäzet omat pyhät

Johannekset

Kezä 2019 on Suomen pravoslaunoin kirikön historiessa merkičykselline, sentäh kun sih aijottuu kaksi kanoniziiruičendua, Iivana Valamolazen da Iivana Songajanrandalazen pyhien joukkoh liittämizen sluužbat. Suomessa Iivana Valamolane on tundiettu Valamon shiimaigumena Johanneksena da Iivana Songajanrandalane nimellä Johannes Karhapiä.

 
Konstaninopol’an ekumenizen patriarhuatan Pyhä sinoda jo mulloin hyväksy Suomen ortodoksizen kirikön alottehen shiimaigumena Johanneksen da Johannes Karhapiän kanoniziiruičennasta nimilöillä Pyhittäjä Iivana Valamolane da Pyhä muučenniekka da tunnustaja Iivana Ilomanččilane. Myöhembäh tämän vuuven keviällä Iivana Ilomanččilazen nimie tarkennettih da pyhän nimeksi tuli Iivana Songajanrandalane.

 
Iivana Valamolazen pruazniekallizet kanoniziiruičendasluužbat piettih jo 31.5.–1.6.2019 Valamon manasterissa Heinäveillä. Yhellä tiedä Iivana Valamolazesta tuli Suomen ortodoksizen kirikön enzimäne pyhä rištikanza. Iivana Songajanrandalazen kanoniziiruičendasluužbat pietäh tulien kuun aigah.

 

Iivana Valamolane, alguperäzellä nimelläh Ivan Aleksejevič Aleksejev, syndy 14.2.1873 Tverin guberniessa. 1900-luvun allussa Iivana azettu elämäh Valamon manasterih Luadogalla, da talvivoinan jälgeh hiän piädy Uudeh Valamoh Heinäveillä. Händä tundiettih Suomen pravoslaunoissa kirikössä kunnivoitettuna ohjuajana, kumbazen luo tuldih kuundelemah neuvoloi da suamah vägie mieliabieloin kessellä. Iivanan omillah opassettavilla kirjutetut kirjazet jullattih jo hänen eländäaigah. Shiimaigumena kuoli Uuvessa Valamossa vuodena 1958.

 
Iivana Songajanrandalane libo Ivan Vasilinpoiga Karhapiä syndy 13.7.1884 Jovensuun da Ilomančin välillä olijassa Songajanrannassa. Karhapiä ruado pravoslaunoin vieron opastajana vaigeissa ololoissa 1900-luvun allussa, konza kirikön vieruo yhissettih ven’alazuon varavoh. Suomelazet kanzallismielizet ei Karhapiän ruandua suvaittu, da kanzalaisvoinan iellä händä allettih pidiä čuarinvallan evustajana da bolševikkana. Vuodena 1918 Karhapiä vangittih da kulletettih yhessä toizien vangittuloin kera Jovensuun Siilaizih, missä heijät ammuttih.

 
Iivana Songajanrandalazen pyhien joukkoh lugemizen sluužbat pietäh 12.–13.7.2019 Pyhän prorokka Hannan kirikössä Songajanrannassa. Piätinččänä pyhän muissoksi pietäh lizäksi kaksi panihiidua, enzimäne Jovensuun Siilaizilla pyhän ammundakohassa da toine Ilomančin Kokonniemessä pyhän kalmalla.

 

Kiändäjä: Katerina Paalamo
Lähtehet:
https://yle.fi/uutiset/3-10732270
https://yle.fi/uutiset/3-10808176
https://www.ort.fi/uutishuone

Fotokuvat: Wikipedii

Vastaa

Sähköpostiosoitettasi ei julkaista. Pakolliset kentät on merkitty *