Karjalazii suarnuleirilöi on otettu vastah rakkahal da hyväl mielel

Jovensuus alaškolaigähizih lapsih näh on olluh tarittavannu karjalankielisty ruandua kaikekse kezäkuudu. Karjalan Kielen Seuru on pidänyh Sinkkolan kodielättipihas nelli karjalastu suarnuleirii peräkkäi. Leirit roittih monile ylen mieldy myöte. Yksi pereh matkai Jovensuun leirih kai Kotkaspäi!

Päivyleirilöin ohjuajannu on olluh opastai Elena Kurki, kudai ruadau opastunduvuvven aigua sežo seuran kierdäjänny opastajannu. Ližäkse häi opastau karjalan kieleh seuran loittonopastuseksperimentas. Äijät leiriläzet jo tämän vuvven aigua ollah käydy Kurren kerholoih. Jo kerholois lapset ollah äijäl suvaittu  Elena-opastajua da suadu enzimäzen kosketuksen da kybenen karjalan kieleh.

Syöjätär
Kuvas: Konzu Syöjätär kiändyy ymbäri,  pidäy jämpistyö, et tahtone roita syödäväkse!

Kezäleirin tiemannu ollah oldu karjalazet suarnat omien huahmoloinke da varattavien dai vesseliengi tapahtumienke. Leirih käynnyöle lapsele ei pidänyh maltua karjalakse, da kieleh opastundu on alganuh juuri leiris. Lapset oldih iložat sit, kui hyvin hyö ellendetäh karjalazii sanoi libo kogonazii suarnoi. Kurren opastandu on ylen aktiviiruiččii. Suarnoin sanelendu da luvendu roijah nenga, gu lapset iče piästäh roulisovis ozuttelemah suarnan tapahtumat.

Suarnu
Kuvas: Karjalazet suarnat elavutah, konzu iče rubiet niilöi ozuttelemah!

Enzimäzen nedälin leirih käynnyön Ellin mieles paras dielo leiris oli se, gu häi piäzi silittämäh kozanvuonua. Nedälin aigua Elli pani mustoh äijän karjalastu sanua, hos ennepäi ei ni maltanuh karjalakse. Rita sežo suvaičči kävvä elättilöin luo. Sen ližäkse mualuandu oli moine mugažu dielo! Eevin  mieles vesselembii dieloloi oli luajilmuksien azundu da enne kaikkie robotan luajindu. Nea saneli, gu on käynnyh Elenan kerhoh jo omas eziškolas. Neangi mieles elätit da mualuandu oldih leiril kaikis parahat.

Suarnuleiri
Kuvas: Karjalazes suarnuleiris piäzet tuttavumah kodižiivattoih!

Kolmas leiri loppih vähästy enne Iivananpäiviä, da jälgimäine leiri pietäh tuliel nedälil. Heinykuul ruandu jatkuu vie lapsien mualavuskerhonnu, kudai organizuijah Sinkkolas tossarres piätteniččässäh 12–14 aigah paiči nedälii 29.

Suarnuleiri2
Kuvas: Leirin loppiettuu enzimmäzen nedälin leiriläzet suadih leiritovestukset da pehmiet bovat.

Tekstu: Heini Karjalainen
Kiännös: Natalia Giloeva
Kuvat: Heini Karjalainen da Maria Kuismin

Vastaa

Sähköpostiosoitettasi ei julkaista. Pakolliset kentät on merkitty *