Vuuvven 2019 europarlamenttivaalien tulokšet

Europarlamenttivaalit

Vaalit piettih kaikissa EU-maissa 23.–26.5.2019. Jokahisešša EU:n muašša valittih tietty miärä jäšenie Europan parlamenttih. Kaikkieh Europan parlamentissa on 751 jäšentä. Jokahisella jäšenvaltijolla voipi olla enintäh 96 jäšentä ta vähintäh 6 jäšentä. Tänä vuotena Šuomešta Europan parlamentih valittih 13 jäšentä. Još Britanija eruou, Šuomi šuapi 14. jäšenen.

Šuomešša europarlamenttivaalit piettih oraškuun 26. päivänä. Šamana päivänä tulokšetki oltih tiijošša. Tänä vuotena iäneštämäššä oli käynyn enemmän ihmisie verrattuna iellisih vuosih, ka iäneššyšprosentti oli vain 42,7. Kaikkie enemmän iänijä šuatih šeuruavat puoluvehet: Kanšallini Liitto (20,8%), Vihrie liitto (16%), Sosiaalidemokraattini puoluveh (14,6%).

Tänä vuotena Šuomešša Vihriet šuavutettih oman istorijah parahimman tulokšen. Heistä iänešti 16% prosenttie kaikista valiččijista. Vuuvven 2014 europarlamenttivaaliloissa puoluveh šai 9,3% iänijä. Esimerkikši tänä vuotena Helsinkissä Vihriet šuatih enemmän iänijä kuin muut puoluvehet.  Šilloin kuin Šuomen Keškuš -puoluvehešta iänešti vähemmän ihmisie verrattuna iellisih vuosih. Tänä vuotena heistä iänešti 13,5% valiččijista, a vuotena 2014 tuloš oli parempi – 19,7%.

Näin Europan parlamentissa paikkoja šuatih šeuruavat puoluvehet: Kanšallini liitto (3), Vihrie liitto (2), Šuomen Sosiaalidemokraattini puoluveh (2), Peruššuomelaiset (2), Šuomen Keškuš (2), Vašemmistoliitto (1) ta Šuomen ruoččilaini kanšanpuoluveh (1). Još Brinatija eruou EU:šta, ni Vihriet šuahah vielä yhen paikan Europan parlamentissa.

Koko Europan maissa iäneštämisprosentti on noin 51%. Pahin valiččijen aktivisuš oli Slovakijašša (22,74%). Belgijan valiččijat oltih kaikista aktiivisimmat (88,47%). Eniten paikkoja Europan parlamentissa šai Europan Kanšanpuoluvehen ryhmä.

Nämä tulokšet ollah vielä aluštavat. Muutomat muat ei vielä ilmotettu vaalien lopullisie tulokšie.

Ajankohtaista tietuo tulokšista löytyy saitilta: https://vaalitulokset.eu/

Lähtehet:

https://yle.fi/uutiset/3-10802915
https://vaalitulokset.eu/
https://vaalit.fi/europarlamenttivaalit

Teksti: Irma Aleksejeva
Kuva: Pixabay

Vastaa

Sähköpostiosoitettasi ei julkaista. Pakolliset kentät on merkitty *