Karjalazus 2000-luvulla -muistotiedoloin keriändä jatkuu

Mimmoine on karjalazien omakuva 2000-luvulla? Suvaijahgo karjalazet ainos vain toizien kera yhessäolendua? Mitys on linnoissa eläjien karjalazien karjalazus? Kuin vaikutetah siirdolazus-, pagolazus- da evakkokogemukset karjalazuoh – libo vaikutetahgo ne?

Karjalazus 2000-luvulla

Vielä on puolitoista kuuda aigua ottua ozua kerävöh! Suomelazen Kirjallizuon Seura (SKS), Karjalan Sivissysseura, Urbuana karjalazus -hankeh i Tunnussuksie: Pagolazuon vaigiet historiet da muistamizen kulttuurat -hankeh ollah järjessetty karjalazien muistotiedokeräyksen. Keräys on algan 1.12.2018, ga omie kirjutuksie voibi työndiä 30.6.2019 suaten.

Sanele välläšti omasta dai oman perehen da yhtehizön karjalazuosta. Vassata voit ezimerkiksi tämänmoizih kyzymyksih:

Perehen historie

Oletgo karjalane?

Ket omista vanhemmista libo heijän vanhemmista ollah karjalazet? Mistä päin nygöistä Suomen Karjalua, luovutettuloi alovehie libo Karjalan tazavaldua ollah hyö roduzin?

Paissahgo/paistihgo omassa suvussa karjalaksi? Ket sih paissah/paistih?

Kuin karjalazus nägyy omassa da suvun eloksessa libo pruazniekoissa?

Midä karjalazesta kulttuurasta on jiänyn elämäh omah pereheh? Midä ollah unohettu?

Pagolazus, siirdolazus, evakkokogemukset

Sanele omasta ičestä libo suvun starina. Ongo siun pereh tullun Suomeh Ven’an puolelda libo voinan jälgeh luovutettuloilda alovehilda libo Ven’an Karjalah Suomesta? Mimmoizet oldih uuzih ololoih mugaudumizen vaihiet? Moitittihgo kandarahvas tulijoi? Kuin da kuin pitkäh moitittih?

Midä pagolazus/siirdolazus merkiččöy omassa perehessä? Kuin siidä paistih?

Kuin säilytettih yhtehys endizih kodipaikkoih?

Midä pagolazus merkiččöy siula nyt?

Nygykarjalazus da nuoret linnoissa eläjät karjalazet

Mitys on tämän aijan karjalazus?

Midä voizit sanella linnoissa eläjien karjalazien karjalazuosta? Ollahgo hyö erimoizet kuin muu rahvas?

Kuin nägyy karjalazus nuorien linnoissa eläjien karjalazien kulttuurassa? Eruougo nuorien karjalazien karjalazus ruavahembien karjalazien karjalazuosta?

Midä kaikkie siun linnalazeh karjalazuoh kuuluu?

Yhissysruanda

Mimmoizih karjalazih järjestölöih libo yhissyksih kuulut? Kuin da mintäh liityit järjessön jäzeneksi? Äijängö siula oli silloin igiä?

Kuin tuagieh olet ottan ozua Karjalan Liiton kezäpäivih? Mimmoine merkičys kezäpäivillä on siun mielestä karjalazilla?

Midä karjalazus siula merkiččöy? Mitys on karjalazus tulevazuossa?

Näin vastuat

Kirjuttua voit omalla kielellä da omah stiilih. Tekstan piduhutta ei ole rajotettu. Kirjuta vastaukseh dai luba sih, jotta siun annetun ainehiston voibi panna SKS:n arhiivah nimellä libo nimimerkillä.

Vastauksen voit työndiä sähköpoštan liittehenä adressih keruu@finlit.fi. Kirjuta sähköpoštan aihehkenttäh ”Karjalaisuus”. Ozua voit ottua i SKS:n sivuloilla olijalla ankietalla. Kirjutukset voibi työndiä dai pošta-adressih Suomalaisen Kirjallisuuden Seura, arkisto, PL 259, 00171 Helsinki. Kirjuta kanverttah ”Karjalaisuus”.

Liziä tieduo muistotiedoloin kerävöstä suat SKS:n verkkosivuloilda. Tuloksista tiijotetah sygyzyllä 2019.

Lähteh: SKS
Kiännös: Katerina Paalamo
Kuva: Pixabay

Vastaa

Sähköpostiosoitettasi ei julkaista. Pakolliset kentät on merkitty *