Karjalan kieleh da sen paginluaduloih terväh voit tuttavuo videoloin vuoh

Mennyt nedälil suovattan da pyhänpiän karjalan kielen opastajat yhtes karjalan pagizijoin da aktivistoin kel kuvattih karjalankielizii vuorovaikutusvideoloi Jovensuus. Tämä tapahtumu oli jo nelläs Karjalan Kielen Seuran organizuittu opastajanopastuspido, da se myösgi piettih yhtesruavos Päivännouzu-Suomen yliopistonke.

Videot 2
Kuvas: Natalia Giloeva, Olga Karlova da Katerina Paalamo

Videoloi oli luajittu kolmel Suomes paistaval karjalan kielen murdehel: vienan-, suvi- da livvinkarjalakse. Myöhembäh videot jullatah seuran YouTube-kanualas da niilöin linkat pannah seuran avvonazeh verkokirjastoh. Videoloih ližätah vie tekstitys, sendäh niidy roih kebjei kaččuo da ellendiä. Videot ei kuuluta varzinazih opastusvideoloih, niilöis on eriluaduzis tilandehis improviziiruittuu da luonnollistu lyhyččästy paginua. Videolois kuulet mostu karjalastu paginua, mittustu on nygözes Suomes.

Videot 5
Kuvas: Sirkka Vepsä da Elena Kurki

Kuvavusnedälinloppu oli pitky da ruaduo täydyi, ga sih syndyi sežo nagruo da iluo. Karjalan Kielen Seuru äijäl passiboiččou kaikkii tapahtuman ozanottajii sego eriže vie professorua Helka Riionheimuo hyvin luajitus yhtesruavos!

Videot 4
Kuvas: Anja Suvanto, Irma Aleksejeva da Kerttu Nurmela

Tekstu da kuvat: Heini Karjalainen
Kiändänyh: Natalia Giloeva

Vastaa

Sähköpostiosoitettasi ei julkaista. Pakolliset kentät on merkitty *