Jovensuun Paginperti: Hyviä keziä kaikile, tulgua meile elokuul!

Jovensuus jo kolme vuottu kerävynnyh karjalan kielen taratandukerho Paginperti pidäy loman kezän aigua. Perindön mugah keviän jälgimäine Paginperti kerävyi Veikko Rajahalmien kodah Pyhäsellän Tikunsalos. Sie söimmö suolastu dai magiedu, joimmo vuassua dai koufeidu sego pagizimmo kezäpluanoi, eurovalličuksii da jiäkur’oidu.  Paginperti on moine kohtu, kus joga tiemua voit paista, menis vai pagin karjalakse. Toiči pagizemmo kielen kehitysty da elvytysty. Gostis Veikolluo olles ainos kävymmö mustah kylyh. Vastebo sie löyly on magei! Kylysgi karjalaine pagin jatkuu.

Nygöi Paginperti pidäy kezälomua da jatkau omau ruandua elokuul. Meil, paginpertiläzil, olis eräs toiveh. Tahtozimmo olla yhtevyksis da yhtesruavos toiziengi karjalazien paginkerholoinke. Mieleh roittas gostih kävyndy toine toizelluo. Himoittas, gu paginkerhuo rodies vie ližiägi ymbäri Suomen. Omah Jovensuun Paginpertih vuotammo uuzii tarattajii dai pajattajii! Älä varua, tule meile! Kai karjalan paginluavut ollah pättävät, čomat, arvokkahat da suvaittavat – tämä on meijän piäajatus, kudamua olemmo jo ezitännyh äijän kerdua. Ylen hyviä kielenmaltuo sežo ei pie vältämättäh olla. Allukse voit tulla vaigu kuundelemah! Huomuat ičegi, kui terväh karjalan kieli tartuu sinuh da nenga livutgi pagizemah karjalakse.

Hyviä keziä kaikile! Tulgua Paginpertih!

Veikon kovas
Kuvas: Nengoine čoma seiny on Veikon kovas.

Tekstu: paginpertiläzet Natalia Giloeva da Timoi Munne
Kuva: Natalia Giloeva

Vastaa

Sähköpostiosoitettasi ei julkaista. Pakolliset kentät on merkitty *