Saimuan da Luadogan järvin’orppih liittyjiä yhtehisruaduo lizätäh

Suomen da Ven’an järvin’orppih liittyjä yhtehisruadohankeh CoExist (Towards sustainable coexistence of seals and humans) on suanun kolmen vuuven rahotuksen. Jyrrinkuun (aprel’an) allussa alotetun hankkehen avulla eissetäh tutkimusyhtehisruaduo Suomen da Ven’an välillä da tiijon jagamista n’orppien da rištikanzoin rinnakkahelännästä eriluaduzilla yhtehysjoukkoloilla. Projekta on uuzi avaus suomelais-ven’alazessa n’orppientutkimuksessa lässä kahenkymmenen vuuven hil’l’azen vaihien jälgeh. Hankkehessa keskitytäh n’orppien eländätavan tutkindah da sidä kautti i rištikanzoin da n’orppien rinnakkahelännän eistämizeh opassuksen da tiijonvaihannan avulla.

Norppa

Kuva: SLL / Juha Taskinen

Saimualla käytettylöistä metodoista suaduo tieduo da malttuo viijäh Luadogalla niin tutkimuksen kuin i suojelun alovehilla. Kalassusta da matkailuo kačotah hankkehessa n’orpan da rištikanzoin elännän yhtehsovittamizen prinsipalla pagizutteluloin da tapahtumien muuvossa. Saimualda ezimerkiksi viijäh tieduo n’orppua huomivoh ottajasta kalassuksesta Luadogalla. Lizäksi saimuann’orpalla kehitettyö yksilöllistä tunnustamistabua käytetäh hyväksi i luadogann’orppien tutkinnassa. Tutkijat voijah jällittiä n’orppien liikkehie satelliittatyöndimillä. Hankkehessa kehitetäh dai automuattista tunnustamismetodua mollemmilla n’orppalajiloilla. Tieduo n’orpista opitah lizätä Suomessa da Ven’alla eriluaduzien, školaniekoilla da rahvahalla järjessettylöin tapahtumien kautti. Järvin’orppien suojelun avulla vardeijah i näijen kahen ainavoluaduzen järven luonduo da taritah luondoelämyksie rištikanzoilla dai tulevazuossa.

CoExist-projektua ohjuau Päivännouzu-Suomen yliopisto. Projektah otetah ozua i Lappienrannan teknilline yliopisto, Suomen luonnonsuojeluliitto da Biologat luonnonsuojelun puolesta Piiteristä. Hankeh kuuluu Suvikoilis-Suomi–Ven’a CBC 2014-2020 –programmah, kumbaista rahotetah EU, Ven’an federacie da Suomen valdivo.

Lähtehet: Päivännouzu-Suomen yliopisson da South-East Finland – Russia CBC 2014-2020 –programman verkkosivut

Kiännös: Katerina Paalamo
Kuva: SLL / Juha Taskinen

Vastaa

Sähköpostiosoitettasi ei julkaista. Pakolliset kentät on merkitty *