PIÄKIRJUTUS 12.3.2019

Mindäh Karjalan Kielen Seurua da sen elvytysruaduo vastustetah?
Monet meijän jäzenet ollah viime aigoinnu kyzytty minul, mindäh meijän ruaduo tozi azies vastustetah, ku uuttu tulostu luajitah kogo aijan da kai dieluo kaččojat voijah nähtä sen? Kyzyjät i sežo monet ulgopuolizet diivuijah yhteltiedy, mindäh erähät karjalankielizet da yksi karjalazien yhtistysgi ruatah muga aktiivizeh seurua vastah? KKS:n ruaduo da johtajii moititah alalleh internetas, enne kaikkie somes ‒ da puaksuh ylen julgieh luaduh. Eräs karjalazien seuru on levitännyh vastuksen sežo Opastus- da kul’tuuruministerstvah työndämäl sinne kirjastu, kudamis on viäriä tieduo seuras. Niilöin tarkoitus on olluh vahingoittua Karjalan Kielen Seurua da hätkestyttiä abudengoin maksomiärävysty. Jälgimäzin häirivönluajinduyritys netas on olluh kielastusuudine, kudamas vihjatah, ku seuran sekretarin työnnetyt sähköpoštuviestit voijah olla hakkerin työnnetyt da viestin avuajan tiedokoneh voibi puuttuo hakkerin haldivoh!

 
Misbo täs ruavos tozi azies on kyzymys? Olen ruadanuh karjalazien yhteizölöis vuvves 1975 lähtijen. Karjalazien järjestölöis on olluh kogo aijan kaksi liiniedy. Laidukonservatiivizet aktivistat da yhtistykset ollah sidä mieldy, ku karjalazet ollah enne kaikkie suomelazet, kudamil on silleh hoijettavua da musteltavua karjalastu perindehty. Monil on olluh sežo moine mieli, ku karjalazus häviey vähitellen kogonah. Uvvistusmielizet aktivistat da yhtistykset sen sijah duumaijah, ku karjalazus eläy sežo tulies aijas da ku karjalazet ollah enne kaikkie karjalazet no sežo suomelazet.

 

Uvvistusmielizien karjalazien ruavon perusduumu on olluh jo 1970-luvul algajen se, ku kieldy da kul’tuurua pidäy elvyttiä da kehittiä nygözeh i tulieh aigah näh. Tämä käzitys on lujendunnuh 1990-luvul Europan Nevvoston hyväksyttyy kaksi vähembistösobimustu. Niilöin mugah karjalazet ollah rahvahalline vähembistö da karjalan kieli on rahvahalline vähembistökieli. Vaiku mennyöh aigah tuijottajat karjalazet ollah pyzytty omal perindehellizel liiniel da ollah aktiivizeh vastuttettu uvvenluadustu ruaduo.Vastus on olluh ylen luja Karjalan Liitos da Bomban karjalazes hierus, kudamis allettih nygyaigastu taido- da kul’tuururuaduo 1980 da 1990-luguloil. Nenga sitgi huolimattah, ku nuo hankehet oldih ylen tundietut da kannatetut kogo muas. Myöhembäh kohtakse otettih vuvvennu 1995 perustettu KKS. Laidukonservuatoroin hyökkävykset seurua kohtah ainos vie jatkutah, hos seuru puaksuh on sanonuh, ku on tahtokas yhteisruadoh.

 

Karjalankielizil on vastustajua sežo Suomen ulgopuolel. Nämät hakkerit da trollit ollah ainos vai luajittu häirivyö seuran verkosivuloil da ruadajien sähköpoštis turvuruadolois huolimattah. Täs on roinnuh äijy ylimiärästy vaivua ruadajile i sežo seuran ruavole. Meijän sellitettyy sidä kuspäi hyökkävykset tullah, ellendimmö, ku jället viettih Kitaih. Emmo yhtelläh usko, ku viäryniekat ollah kitailazet.

 

Karjalan Kielen Seuras toivotah, ku järgi suas voiton da kai mahtollizet karjalankielizet tuaste tuldas kerale yhtehizeh ruadoh. Nengozel pienen vähembistöl maksau ruadua yhteisruaduo, hos kaikis dielolois ei ainos olla samua mieldy. Tädä vuajitah sežo kielipoliitiekas vastuajat virguniekat da poliitikatgi.
Pertti Lampi

2 vastausta artikkeliin “PIÄKIRJUTUS 12.3.2019

  1. Haikumiäräl (2:49)

    Äijät sanotah:
    eihäi tädä kieldy pie
    nikenele, ei
    sinule, ei minule.
    Kirjutan tuaste runon.

    Lauri Luukkonen

Vastaa

Sähköpostiosoitettasi ei julkaista. Pakolliset kentät on merkitty *