Eero Rantala oli ylen ruadai mies

Meijän seuran pitkyaigaine da arvostettu halličuksen jäzen Eero Rantala kuoli ruttoh voimattomuskohtavukseh 5.päivy tuhukuudu. Händy blahoslovittih tänäpäi Vantaan Honkanummen kappelis.

Eero Rantala
Eero Rantalan ala biznessuselokses, poliitiekas da sežo taidoelokses oli suuri. Nämmis suavutuksis on saneltu mustokirjutuksis moniluguzis sanomulehtis. Yksi sektor yhtelläh on jiännyh enimyölleh mainiččemattah. Häi oli lämmin karjalan kielen da kul’tuuran ystävy da kannattai!

 
Enzimäine da toven merkittävy ruado oli Bomban taloin da karjalazen hierun luadimine yhtes suojärveläzen valdivofinansuministerstvan Paul Paavelanke. Eero Rantala ruadoi kauppu- da tevollizusministrannu vuozinnu 1975 ‒ 1979 i oli piäpozitsies, konzu hankeh suadih alguh da konzu se todevutettih. Voibi sanuo, ku ilmai Eeron panostu Bombua onnuako ei olis nostettu. Terväh Bombas rodih yksi meijän muan tärgevimis matkailukohtis da eräs vuozi myöhembäh sežo ylen kannatettu karjalazen kul’tuuran da taijon ozuttelupaikku mainehikkahan kezäteatran da Bomban pruazniekkunedälilöin suavutuksen täh. Bombale tuli jo silloi äijy kul’tuurumatkailijua ymbäri muailman tunnustumah karjalazeh kul’tuurah. Kai tämä yhtes Karjalan Liiton kul’tuururuavon uvvistumizenke pani alguh karjalan kielen da kul’tuuran voimakkahan nouzukavven, kudai on jatkunuh nämmih päivih suate. Eero Rantala kannatti sit jo silloi meijän kielen da kul’tuuran dieluo ylen suavutuksellizeh.

 
Vuvvennu 2006 meijän seuran johto pakičči Eeruo kerale seuran halličukseh avvuttamah varoinhommuamizes da meijän kielen da kul’tuuran stuatusan kohendamizes. Hänen hyvien välilöin avul seura saigi terväh abuu: ezimerkikse enzimäzet elvytysavut Suomen Kul’tuurudengufondalpäi da Hartwallan fondalpäi avut Muumi-kirju -hankeheh näh. Hänen hyvis välilöis oli äijy abuu sežo silloi, ku kielen stuatusas paistih piättäjienke.Vuozii kestänyh ruado meni edehpäi hyvin kovah vastustukses huolimattah da äijän sežo Eeron suavutukses. Karjalazien kodialoveh -hankeh pandih alguh vuvvennu 2011 Pohjas-Karjalas da sitgi häi oli yksi piäruadai. Suomen kul’tuurudengufondu pani alguh vuvvennu 2012 Aigazen kazvatandan projektan Ven’an suomelasugrilazih rahvahih näh da KKS piäzi Eeron avus kerale julgavotuotandoh, kudamas hyövyttih aiga äijän sežo Suomen karjalankielizet. Vuvvennu 2013 seuru julgai kaksigi Juhani Ahon tevostu karjalakse. Niilöin luajindah suadih varoi tuaste sežo hänen välilöin avul. Meijän seuran johto on käynnyh vuozien varrel sadoi kerdoi pidämäh soviettua virguniekkoinke da Rantalan Eeron on olluh keral ylen mondu kerdua.

 
Olen ruadanuh da olluh kerah monis järjestölöis, ga mostu ahkerua halličuksen jäzenty kui Eero oli en ole vastannuh. Myö halličukset jäzenet toven suvaičimmo Eeruo sendäh, ku häi oli poikkevuksellizen mieluzu ruadodovariššu. Lopukse otan laihinah meijän halličuksen jäzenen Hannu Kilpeläisen harakterizuimistu:”… mustan da mustelen kunnivoijen da igävöijen minun toven arvostettuu Eeruo, monivuodistu vieresistujua KKS:n halličuksen stolas. Eeron paikan täyttämine voi olla vaigevin ruado KKS:n lähiaigoin ruavos karjalan kielen elvytändäh näh. Ga myö menestymmö sitgi (sanos Eero)!”
OLE AINOS MUSTETTU!
Pertti Lampi

Vastaa

Sähköpostiosoitettasi ei julkaista. Pakolliset kentät on merkitty *