Tule sinägi vuvven 2019 Karjalazeh luvendukodvazeh!

luvendukodvaine

Karjalazen luvendukodvazen tarkoituksennu on suaja karjalan kielen pagizijoi, suvaiččijoi da opastujii lugemah kirjalližuttu karjalan kielel. Luvendukodvazeh voit ottua ozua lugemal kirjoi hos mil karjalan kielen murdehel.

Luvendukodvaine on 10-kohtaine, da kohtis mainitut kniigat voit lugie hos mittumas jälletykses. Vuvven aigua jullatah ližiä tieduo niilöih lugojih näh, ket innostutah luvendukodvazeh enämbäl. Kirjoinnu pietäh ezimerkikse karjalankielizii kaunehkirjoi, tiedokirjoi da lapsienkniigoi. Kirju ei pie olla vältämättäh painettu, da iänikirjatgi sego internetas jullatut tekstat päitäh tämän luvendukodvazen kniigoikse. Sähközes muvvos olijua lugemistu lövvät paiči muudu Karjalan Kielen Seuran avvonazes verkokirjastos. Ližiä lugiettavua voit tilata KKS:n verkolaukas.

Luvendukodvazen tarkoituksennu on ližätä mielenkiinduo da innostustu karjalankielizis kirjois, ga vältäjen ylimiärästy stressua. Musta, gu ei jogahistu sanua pie vältämättäh tiediä-tundie. Ollou mitah sanan libo virkehen merkičys ellendämätöi, voit eččie tieduo sanakirjois.

Karjalazen luvendukodvazen verdavusjoukonnu on Facebook-luvendupiiri. Luvendupiiris voit paista ellendämättömien sanoin da virkehien merkičyksis sego jagua iččes luvendukogemustu muijien joukkoh kuulujienke.

Karjalaine luvendukodvaine 2019:

1. Kirju, kuduan nimes mainitah mitahto elätti
2. Kirju, kuduas on sinun mieles čoma kanzi
3. Runokniigu
4. Kniigas on äijän kirjuttajan kirjutustu
5. Kirju, kuduan tapahtumat sijoitutah suarnumuailmah libo toizeh muah
6. Mustelmukniigu
7. Kirju, kudai on piästetty ilmah vuvvel 2018
8. Kirju, kuduan nimes on yhtyssana
9. Lapsienkniigu
10. Kirju, kuduan nimes on paikannimi, ezimerkikse hierun, linnan, muan, järven nimi

Kaikkien luvendukodvazen suoritannuzien kesken arvotah hyväččäzii kirjupalkindoloi. Arvondoih voit ottua ozua täyttämäl da työndämäl luvendukodvazen sivuloil olijan ankietan poštači libo sähköpoštači 15.12.2019 sah.
Poštuadressi: Karjalan Kielen Seura, Pohjoiskatu 6, 80100 Joensuu.
Sähköpoštuadressi: heini.karjalainen@karjal.fi

Jua omua luvendukogemustu somes: #karjalaineluvendukodvaine #luvekarjalakse.

Tekstu da kuva: Heini Karjalainen
Karjalakse kiändänyh: Natalia Giloeva

Vastaa

Sähköpostiosoitettasi ei julkaista. Pakolliset kentät on merkitty *