Alguperäzen rahvahan kuolii kieli nouzi kannatetukse Uvves-Zeelandies

Maoreja

Moni maori maltau maorikse vaiku kul’tuuruozutuksien pajoloin da kul’tuuruperindehsanaston verran, ga jogapäiväzet paginat ei menestytä. Uuzi-Zeelandii ozuttau muailmale mallii alguperäzen rahvahan kielien hoidamizes. Muan alguperäzen rahvahan kieli maori oli varavos hävitä kogonah da Unescon mugah se viegi on pahas tilas olii. Kieldy kannatetah yhtelläh ainos vai enämbän nuoret roinduperiä myöte maorit da sežo moizet nuoret, kudamil ei ole maori-tagaperiä.

 
Uvves-Zeealandies anglien kieli oli vie erähii vuozii tagaperin tävvelleh jättämäs syrjäh maorin kielen. Maorilois enne kaikkie vahnat ristikanzat paistih maorikse. Nygözet keski-igähizet mustetah, ku školas voidih nakazie maorikse pagizemizes da vahnembii rohkattih pagizemah omile lapsile anglien kielekse.
‒ Lapsennu da enne kaikkie neijistämis- da brihastamisigäzenny minul oli huigei omua roinduperiä da opiin peittiä sen. Nygöi olen ylbei sit, ku olen maori, sanelou Amiria Puia-Taylor STT:le.
Aucklandas eläi 30-vuodehine Puia-Taylor on ottanuh ihan nygöi ičelleh maorinaizien perindehellizen leugutatujirouhkan. Hänen käzien tatujirouhkat sanellah vahnembien suguloin starinua. Prarodiitel’at opastettih hänele maorin kielen da kazvatettih hänes maorin, ga naizen vahnembat paistih omile lapsile vaiku anglien kielekse.
‒ Smietin rozatatujirouhkua hätken sendäh, ku se on muga nägyi. Olluzin ezimerkikse klijentanpalveluruavos, en olis varmah ottanuh rozatatujirouhkua. Maoriloin stuatussu on kohendunnuh, ga vie on alendamistugi, Puia-Taylor sanou.

 
Piämiäry on: maorin kieli kaikkih školih
Maorin kielikursien kannatus kazvau kogo aijan. Nenga nelländes muan perusškolis tariččou maorin kielen opastustu. Valdivon piämiäränny on suaha maorin kielen opastustu kaikkih valdivon školih ei myöhembä vuottu 2025. Suurin probliemu on hädä opastajis, kudamat maltetah maorin kieldy.
‒ Ylen äijis školis käytetäh opastukses maorinkielizii sanoi kui tervehtyksii, da kaikis eziškolis opastutah ezimerkikse noumerot da värit maorikse sego pajatetah maorinkielizii pajoloi, kerdou maorikielikomissien johtai nevvonandai Colin Feslier.
Hänele ei ole mieldy myöte duumu maorin kielen pakollizes školaopastukses, hos vuitti vahnembis sidä vuadiugi.
‒ Maorikielikomissien piämiäränny on suaha maorin kieles hyväksyttävy da elävy arren kieli anglien rinnale. Tilandeh on jo vägi hyvä, Feslier sanou.
Lähteh:Keski-Suomalainen / STT
Fotokuva: Keski-Suomalainen / Lehtikuva / Päivi Arvonen

Vastaa

Sähköpostiosoitettasi ei julkaista. Pakolliset kentät on merkitty *