Tänäpäi pruaznuijah europan kielii

Europan kielien päivän hantuzis on kaikenluadustu tapahtumua kui Suomes muga i muijalgi Europas.

ID-81988-GUID-1A02C14D-F49A-4F6C-A869-7D3577510F5D
Ezimerkikse Seinäjoven rahvahanopistos voibi tunnustuo europpalazih kielih Speak datingas. Kyzymykses on 5-10 minuutan piduhine opastuskodvaine, kudaman aigah opastutah kielien perustehih. Opastajinnu ruatah muamankielizet ristikanzat, da kielet kudamih tunnustuo ollah estounii, vengrien kieli, ruočči, pol’šan kieli, turtsii, Austrien germuanien kieli da portugalii. Rahvas voijah sežo yhtyö kielitiedokižah da ližäkse tapahtumas on elämystroppaine lapsih näh.
Kainuus pruaznuijah Europan kielien päiviä kogo nedälin aijan (24.–28.9.2018) Europe Direct Kainuu järjestäy kižan sotsializes meedies, kunne kižah yhtyjät voijah työndiä mustoloi libo kerdomuksii ičele libo toizile tapahtunnuzis kielihairahtuksis.
Jyväskylän yliopiston opastujat järjestetäh päivän kunnivokse kielikampuanien laukkukeskus Forumas. Paikal on opastajua yliopistos-, kezäyliopistos- da rahvahanopistos- sego ammattikorgeiškolaspäi pagizemas kielenmalton merkičykses da vastuamas vierahih kielih opastundah liittyjih kyzymyksih.
Turun piäkirjaston Studios on tänäpäi pido školaniekkoih, opastajih, kielih opastujih da kielih mieldy kiinnitännyzih näh. Vuvven tiemannu on monikielizys da opastumizen uvvet tuulet. Enne kaikkie tiemoinnu ollah germuanien kieli da Austrii, kudai loppuvuvven aigua on Europan Liiton paginanvedäjänny.
Valdukunnaline piätapahtumu järjestetäh suovattan 28.9. Hanasuaren ruočilas-suomelazes kul’tuurukeskukses. Hanasuares pietäh sežo seminuaru, kudai kerävyy Suomes eläjien kielivähembistölöin stuatussua da kul’tuurua käzittelijöis paginvuorolois.
Muudu lugiettavua:
https://www.kotus.fi/nyt/viikon_vinkki/viikon_vinkit_2018/euroopan_kielten_paiva.28684.news
https://edl.ecml.at/Home/tabid/1455/language/fi-FI/Default.aspx
Lähtehet: www.seinäjoensanomat.fi, kielikampus.jyu.fi, kainuunliitto.fi, www.schuman-seura.fi, www.sukol.fi

Vastaa

Sähköpostiosoitettasi ei julkaista. Pakolliset kentät on merkitty *