Karjalan kielen luguperti avavui Turus

23. elokuudu 2018 Turus piettih enzimäine karjalan kielen luguperti. Vedäjänny toimiu ameriekkalaine Marc Bradford, kudai opastui kielitiedoh da karjalan kieleh Päivännouzu-Suomen yliopistos Jovensuus, da hyvin maltau karjalakse. 8 hengie tuli lugemah. Lugijat kaikin oldih nuoret, nenga 20-vuodizet, da äijät heis opastutah suomelas-ugrilazih kielih da kul’tuurah Turun yliopistos. Lugijat hyvin luadivuttih keskenäh. Erähät jo vähäzen tiettih karjalan kieleh da karjalazeh kul’tuurah näh, ga niken ei vie maltanuh karjalakse. Yhtelläh kaikin hyvin maltettih paista milgi muul kielel (ezimerkikse udmurtan da koltansaamen kielil) da hyvin ellendettih kielitieduo da kielen opastumistu.

Luguperti

Kahtes čuasus lugiettih Maria Kähärin kirjutettuu livvinkarjalankielisty Milan perehen päivy -kniigastu keskessäh. Loppussah ei ehtitty lugie sendäh, gu rodih muga äijy kyzymysty kieles. Hyvä oli, gu Kähärin kniigas löydyy joga toizel sivul sanastuo, tundemattomua sanua ei maksanuh eččie muijal. Yhtelläh migäli kielioppi libo sanasto erottih suomen kieles, pidi sellittiä sanoin da virkehien merkičykset. Ezimerkikse laukku-sana (suomekse kauppa) kiinnitti mieldy. Äijy lugijua tunnisti sen ven’alazen lavka-sanan täh. Kaikkii miellytettih moizet virkehet, kui  “Laukku ei ole loitton.” Eräs lugii oli jo ottanuh sanan käyttöh suomekse, da hänen pereh seguou joga kerdua, konzu häi sanou “Minä menen laukkah.”

Konzu Milan perehen dovariššu kyzyy dorogan toizel puolel, gu hyö vuotettas händy, sit virkehes olijan “häi kirguou” eräs lugii kiändi suomekse “hän kirkaisee”, mi nagratti muidu lugupertiläzii.

Lugupertin lopus piätettih, gu kaikin tahtotah kerävyö lugemah uvvessah. Enzimäine luguperti sit ozitui ylen hyvin. Sie oli ystävälline tunnelmu. Turusgi löydyy mielenkiinduo Karjalah da karjalan kieleh näh.

Noudajua lugupertii pietäh nellänpiän 18–20 čuassuu aijal, Turun yliopiston Feeniks-kirjastos. Ližätieduo da tapahtumien aijan libo kohtan poikkevuksii löydyy Facebook-sivus (https://www.facebook.com/turkuluguperti) libo kyzymäl Marcal sähköpoštači (mbradford820@gmail.com). Tulgua terveh kaikin lugupertih!

Tekstu da fotokuva: Marc Bradford

Vastaa

Sähköpostiosoitettasi ei julkaista. Pakolliset kentät on merkitty *