Inarinsaame on nygöi ilmai kieliruavonruadajua ‒ kielenhuoldo Facebookan da omatahtozien käzis?

Saamen kielien kielenhuollos vastuaju Saamen Kielikaltio on ilmai lujua finansiiruičustu. Pieni inarinsaamen kielikollektiivan omatahtozet pietäh yhtes huoldu omas kieles da avus heil on Facebook da yhtehine Google-tiijosto.

 

Inarinsaamenkielinen opettaja Petra Kuuva
Inarinsaamen kielen opastai Petra Kuuva(fotokuvas) on puaksuh kyzynyh neuvvuo Kielikaltion kieliruavonruadajal, konzu mitah sana libo muu kieleh liittyi dielo on olluh kavoksis. Siepäi on kerras suannuh nevvuo da opastajan aigua on siästynyh, ku hänel ei pidänyh keksie sanua, kudai mahtollizeh on jo olendas.
Kielikaltio libo Sámi Giellegáldu pidäy huoldu kaikkien saamen kielien kielialan kyzymyksis da koordiniiruiččou niilöi yhtes Saamelazien suvvon ker. Oraskuul finansiiruičendu yhtelläh loppih da alallistu piätösty finansiiruičendah ei ole löydynyh. Norveegien, Ruočin da Suomen Saamelazien suudo järjestäy kieliruavonruadajien palkuandan omien resursoin mugah.
Suomen saamelazien suudo voi palkata inarin- pohjas- da koltansaameh näh kieliruavon ruadajan vie kolmekse kuukse tänä vuvvennu. Inarinsaamen kieliruavonruadai loppi omassah ruavon heinykuun lopul da uuttu ruadajua vie ei ole.
Sotsialine meedii on sendäh tärgei paikku inarinsaamilazile.
Inarinsaamen pagizijoil on nenga 360 jäzenen Facebook-joukko, kudaman nimi on Anarâškielâ orroomviste (Inarinsaamen oloperti), kudamas voi duumaija sanoin taivutustu i kiändämisty da uuzien sanoin kehittämisty.
Kielikaltion inarinsaamelazet aktivistat ollah perustettu pagizijoih näh ližäkse Pikanevvondan ( Liähturavvim). Siegi voibi kyzyö kieles, paista uuzis sanois libo sanoin normiruičendas. Kentah voi kirjuttua Pikanevvondah da omatahtozet ruadajat vastatah.
Petra Kuuva puaksuh kyzyy neuvvuo kielimuasteril libo vahnembal ristikanzal, kudamal on ylen hyvä kielenmalto. Kuuva duumaiččou, ku inarinsaamen kielenhuoldo menöy aijas tuaksepäi sih aigah, konzu inarinsaamie normiruittih omatahtozet.
‒ Olemmo nygöi rounoku histouries, aijas enne sotsialistu meediedy, konzu meil pidi soittua telefonal kelletah da kyzyö mibo olis tämä sana. Ozakse yhtelläh on vie se sotsialine meedii, kudamas voibi kyzyö, Petra Kuuva sanou.
Lähteh: Martta Alajärvi, Yle.fi

Fotokuva: Martta Alajärvi/Yle

Vastaa

Sähköpostiosoitettasi ei julkaista. Pakolliset kentät on merkitty *