Tenon kalastussiännön vastustamizes alganuh vastahnouzu leveni Saamenmuan suuruzekse rahvahanliikehekse – nygöi ičenmiäriämisoigevuttu puolistetah jo monet alovehellizet kollektiivat

Alovehellizien eläjien ičenmiäriämisoigevuttu puolistamah on perustettu moratouriitoimisto, kudai avvuttaa ristikanzoi löydämäh sellityksii ezimerkikse kilbailijoi muankäyttömuodoloi vastah.

moratorio1
Moratourii perustettu! fotokuva: Yle.fi/Ellos Deatnu

Moratourii-duumu roih Tenojoginotkos, konzu alovehellizet vastustettih uuzii Tenojoven kalastussiändölöi. Ellos Deatnu!(Uraa Teno!) -aktivistujoukko sanoi silloi julgi moratourien Tenojoven Tiiransuaren ymbäristöh. Tämän jälgeh perustettih moratourii Nása-mäile, alovehele, kunne tahtottih kaivostu.
Tänä kezän ruado leveni, konzu internettah perustettih moratouriitoimisto nevvomah da avvuttamah ristikanzoi, kudamat tahtotah ližätä omissah alovehien ičenmiäriämisty. Toimiston nettukartas nävytäh nygözet moratouriialovehet: Tiirasuari da Korgeisuari Tenojovel dai Nása-mägi Ruočin da Norveegien rajal. Suomen puolel moratouries keral on erähii pedranomistajien organizatsieloigi Muddusjärvel-, Paatsojovel-, Hammasmäil- da Nellimaspäi. Nása-mäin moratourii on toimistole ylen tärgei ezimerkikse sendäh, ku se on sanottu julgi kui Norveegies muga i Ruočis.

moratorio 2
fotokuva: Yle.fi/screenshot:http://moratoriadoaimmahat.org/moratoriat/

Toimiston ruadajat da Ellos Deatnu!- aktivistat Jenni Laiti, Niilas Holberg da Outi Pieski duumaijah ruadua kaikenjyttysty kezän aigah. Konzu moratouriitoimisto on ”kollektiivutaijolline ičenmiäriämishankeh”, joukko luadi Rájácumman, Tenon vezistön ičenmiäriämisalovehen rajoi sellittäjän taidotevoksen. Hyö ollah sežo paistu ristikanzoinke ičenmiäriämisoigevukses da mahtollizis moratourielois.
Laitin mugah tämänluaduzih protsessoih menöy aigua da tulies aijas ei voi tarkah sanou nimidä.
‒ Äijy taijollistu duumua on sit, kuibo dieluo vois käzitellä. Ga moratouriitoimisto on olluh avvoi vaste yhten kuun, vähäzel jällembäči selgenöy kuibo protsessu menöy edehpäi.
Moratouriitoimiston piämiäry ei ole perustua äijällizeh moratouriedu, vaiku yhtes keksie sellityksii alovehien ičenmiäriämizeh liittyjih kyzymyksih.
‒Duumainnou ristikanzu yksin kois, ku en voi dielole nimidä, häi on jo luobunuh. Ku yhtes pagizemmo dielolois da olemmo yhtes, tulos on jo hyvä, Jenni Laiti sanou.
Lähteh:https://yle.fi/uutiset/3-10294937

Vastaa

Sähköpostiosoitettasi ei julkaista. Pakolliset kentät on merkitty *