Piäkirjutus

KKS:n ruandu jatkuu totuttuh tabah häirivölöis huolimattah

 
Monet meijän seuran jäzenet ollah kyzytty minul, midäbo KKS aijoitteleh ruadua, konzu erähät karjalazet yhtistykset ollah opittu kyskiekseh karjalankielizien evunkančondah sego kielipoliitiekkah. Tiijetäh, ku Suojärven voulostiseuran nygyjohto on ruvennuh ajamah kahten karjalan kielen poliitiekkua vastoin tiedokollektiivan lujennuttu nägökandua. Karjalan kielen vastustajile kui Suomes muga i Ven’al tämä hankeh on ilouudine. Meijän kielen syrjimisty ajajile puolile yksigi karjalan kieli on liigua. Kahten kielen poliitiekku on sendäh oivalline hengentoravehkeh, kudamal voibi vastustua meijän kielen da kul’tuuran oigevuksien kohendamistu. Yhteltiedy voijah sanuo, ku karjalazien rivit ei olla yhtenäzet da virguniekoil sendäh ei maksa tuhlata aigua da dengua tyhjäh ruadoh. Elvytysruadolois yhtelläh ei tule karjalazien toivottuloi tuloksii.

 
Erähät karjalazet yhtistykset toiči opitah puuttuo KKS:n sovietturuadoh, hos yhtistyksien ker on olluh vuvves 1995 suate voimas yhtehine ellendämine, ku juuri KKS ruadau karjalazien evunkaččojannu. Abuu voibi tiettäväine pakita tarbehen mugah, ga tärgielöis kerähmöis ližäjäzenet voijah daže suattua tilandehtu sevoksih.

 
Suomen kielipoliitiekas huoldu pidäjät kolmen ministerstvan virguniekat kučutah nygöi seminuaroih sežo toizien karjalazien yhtistyksien edustajii. Se on hyvä dielo, konzu nenga piästäh muutgi järjestöt vähitellen tunnustumah kielipoliitiekan peitočuksih. Tuas poliitiekashäi läs kai ozuttahes eriluaduzembakse migu allukse duumaittih.

 
Karjalan Kielen Seuru jatkau omua ruandua endizeh luaduh häirivölöis huolimattah. Karjalazien rivit ei toinah olla jagavuttu, vaiku ruaduo ruatah hyväs yhtehizes ellendykses eri toimijoinke. Tämän vuvven elvytysruado jatkuu ylen monipuolizennu, da keral ollah kai karjalan kielen murdehet. Karjalan kielen kielilaudukundu algau oman ruandan lähinedälih. Loppukezäl da sygyzyl seuru varmistau elvytysmiärydengan suamizen valdivon tulien vuvven b’udžettah. Karjalan kielen ližiämisty kielizakonah ajetah ainos vie virguniekkoin vastustukses huolimattah. Uvvennu hankehennu ollah YK:n alguperäzien kielien vuvven projektat. KKS tahtou Karjalan Tazavallan ezimerkin mugah ajua karjalan kielen dieluo sežo alguperäzenny kielenny. Onhäi karjal Suomen kodiperäine kieli.

 
Pertti Lampi

Vastaa

Sähköpostiosoitettasi ei julkaista. Pakolliset kentät on merkitty *