Karjalazet pruazniekal Kouvolan linnas

Heinin_kuvaama_kouvola_20180616_125853_elina_ja_raija_pyoli_eilapollanen
Elina da Raija Pyöli sego Eila Pöllänen (fotokuva: Heini Karjalainen)

Kouvolasgi oli 16.‒17.6  ylen räkki, da kummeksin, kuibo karjalazien kezäpruazniekale kerävynnyöt da rahvahallizih ruuttih sellinnyöt naizet sego herratgi tozi azies voidih niilöi käyttiä. Ga ozakse hyö voidih. Nikonzu en ole nähnyh kerral mostu miäriä čomua, eriluadustu ruuttua. Ihan tavalline fiskul’tuuruzualagi oli sit ylen čoma. Tämä mainittu zualu oli ližäkse täyzi stolua, karjalastu kuvua, kirjua, fotokuvua da kaikenjyttymiä vimpelua Karjalan eri alovehilpäi. Oli täs pruazniekkurahvahale kaččomistu!

Heinin_kuvaama_kouvola_20180616_134001
Eila Pöllänen da arhijepiskoppu Leo kirjoi tutkimas (fotokuva: Heini Karjalainen)

Sie muijen stolien joukos oli Karjalan Kielen Seurangi stola. Paiči myödävänny olluzii kirjoi da cd-diskoi meil oli rahvahale tarittavannu opastustu i kižua. Kai tahtokkahat voidih yhtyö karjalan kielen pikakursah, duumaija vastavuksii arbaituksih i sežo arvata midäbo tarkoitettih karjalankielizet virkehet.

Heinin_kuvaama_kouvola_20180616_125935_karjalan_kurssi
Kummii virkehii! (fotokuva: Heini Karjalainen)

Net oldih ristikanzoin mieles ylen kummat, da ei se ihme olluh. Virkehih näit ku oli kerätty riskusanoi, kudamat toiči pahoi muanitettih vastuajii.Yksikai tämä kiža oli ristikanzoin mieles ylen vessel da nagratti heidy. Päiväine pastoi nenga ollen zualan syväinpuolelgi!

kropattu_Kirstin_kuvaama_laulajat2_IMG_7975
Hannu Musakka da Eila Pöllänen pajatetah, Heini Karjalainen pidelöy sanoi (fotokuva: Kirsti Karhinen)

Fotokuvas nägyy, ku kuundelimmo sežo muuzikkua. Eila Pöllänen da Hannu Musakka pajatettih karjalankielizii pajoloi da rahvahal oli mahto pajattua heijän keral, konzu heih näh oli kirjutettu sanat. Ga toinah hyö oldih vähäzel huijustelijat, vaiku muudamat rohkettih yhtyö pajoh.
Nu, kai suadih yhtelläh iloijakseh muuzikas, hos korvat kaikil välttämättäh täytyttih sežo paginburinehes. Kielet vikse oli voijeltu ylen notkieloikse koufiel da enne kaikkie magieloil, razvazil šipainiekoil, kudamii kuhn’an räkkie ilmua ihmielöinluadijoin tabah tirpajat emändät pastettih ližiä kogo aijan. Hiilavua šipainiekkua saimmo sit kaikin syvvä, lähtie kodih päi niilöin magu kielel da duumaija jo tulien kezän pruazniekkua Hämeenlinnas.

Yksi kommentu “Karjalazet pruazniekal Kouvolan linnas

Vastaa

Sähköpostiosoitettasi ei julkaista. Pakolliset kentät on merkitty *