Karjalazen kirjallizuon luguspektakli

20180227_ständiKarjalazen kirjallizuon luguspektakli ozuttihes rahvasluvun puoles menestyksekse. Oulun alovehen Salmikerhon hommattu pido houkutteli Muhoksele tossargen nenga sada innostunnuttu kuulijua. Koivu ja Tähti -kul’tuurukeskukses pietty pido oli vuitti Muhoksel avattuu karjalankielizien kirjoin ozutteluu, kudaman Oulun alovehen Salmikerho järjesti yhtes Karjalan Kielen Seuranke

 

 

kirjallisuusmatinea_Muhos_arkkipiispa_ja_Menschakoff

Spektaklin kunnivogost’u da piäpagizii oli Helsingin da kogo Suomen arhijepiskoppu Leo, kudai lugi pivos omissah tekstoi da runoloi. Rahvas oldih samua mieldy sit, ku tekstat tahtottih kuulta ihan karjalakse da ei kiännöksii tarvittu. Ozutahes, ku karjalan kielen malto eläy Muhoksel ylen lujannu. Tekstat saneltih vahnois karjalazis kyläkollektiivois, lapsuselämyksis da tunnelmis voinan aigah. Net vuoroi liikutettih vuoroi nagratettih kuulijoi. Rahvahal oli sežo mahtollizus andua arhijepiskopale kyzymyksii hänen omassah tuotandos dai karjalan kielen tilandehes i tulevazuos.
Spektaklin toizennu pagizijannu oli Oulun yliopiston dotsentu Niina Kunnas. Kunnas on tutkinuh karjalan kieldy Oulun alovehel, da häi ezitteli pivos omissah uuzimii tutkimustuloksii. Kunnaksen mugah karjalan kieli on pyzynyh elävänny Muhoksel sendäh, ku karjalazis perehis buabat ollah siirretty kieli lapsilleh da bunukoilleh. Kielen säilymisty on lujah kannatannuh sežo se, ku voinan jälgeh Salmin Käsnäsellän vahnu kielikollektiivu siirrettih Muhoksele läs silläh.
Pivol kuultih sežo Muhoksen kunnanjohtajua Jukka Syvävirtua, kudai ezitteli kunnan nygytilua da tulevazuttu. Jaana Pohjola oli oman tyttären Pietanke luadinuh vesselän luguozutuksen spektaklih näh, i tervehtyssanat sanoi karjalan kielen da kul’tuuran elvytysprojektan koordinuattoru Heini Karjalainen Karjalan Kielen Seuras.

kirjallisuusmatinean_yleisöä

Spektaklin jälgeh kuulijat piästih pagizemah välläh keskenäh. Oulun alovehen Salmikerho taričči heile šipainiekkua, čuajuu dai magiedu havvottuu maiduo. ‒ Ozanottajien miäry oli meile iloine yllätys. Konzu suvut ennevahnas kerävyttih, paginburineh oli ihan yhtehjyttyöh elozu. Karjalaine ristikanzu näit ku maltau yhtelaigua paista da kuunnella, kerhon paginanvedäi Tapani Menschakoff muheloitti.
Mugavu pido tovesti, ku karjalan kieli da karjalazus vie eletäh lujinnu Muhoksel. Karjalan Kielen Seuran kerätty kirjuozuttelu vietäh Muhoksel sežo muile paikkukunnile Suomes.
Heini Karjalainen
Fotokuvan stendas on ottanuh Heini Karjalainen, Tapani Menschakoffan da arhijepiskoppu Leon dai pruazniekkurahvastu fotokuvai Pauli Lutjonen.

Vastaa

Sähköpostiosoitettasi ei julkaista. Pakolliset kentät on merkitty *