Häi sanoi

yksinäisyys1

Häi sanoi
ku ei suvaiče minuu
ei ole nikonzu suvainnuh

hos oldih
net keviän hämärdyjät illat
järven rannal, linnan tulet loitton horizontal

hos oldih
net heinykuun valgiet, räket päivät
da koivuloin vihandat lehtet väittömäs tuules

hos oldih
sygyzyn äijät, äijät vihmažat yöt

hos oldih
net talvizet huondeksen čuasut
konzu oli kylmy da pimei
da yhtes söimmö kagrukuaššua
yhtel samal luzikal
samas torielkas
da yhtes vuotimmo
konzu laukku avatah
da myö tuasen voimmo ostua piivuo

Kolme nedälii tagaperin
sanoit minule
ku et suvaiče minuu
et ole nikonzu suvainnuh;
silloi seizoit uksen ies
kačoit minuu silmih, toinah kyynäl
terväh olis valunuh sinun silmän čupus rožale
opiit muheloittua, sit lähtit
iäre meijän yhtehizes, reduu da pölyö
täyzi olijas pienes fatieras

(Kolmen päivän mendyy ičegi salbain
saman uksen jälgimäzen kerran
da lähtin)

Nygöi olen tiä hierus
muamorukan kois
istun čardakan puolel tuttavas kreslas
da kuundelen radivuo
(sie soi mitah Leonard Cohenin pajo)
käis butilku viskii, duumat vie selgiet

mustelen
midä minule silloi sanoit

mustelen
da ebäilen, lujah ebäilen
pagizitgo tottu
vai valehtu

Onhäi mieros
muga äijän propagandua
da myö putin ristikanzat
sidä kaikis enimäl levitämmö

Lauri Luukkonen

 

Fotokuva: Pixabay

Vastaa

Sähköpostiosoitettasi ei julkaista. Pakolliset kentät on merkitty *