Julio Igleasissua, Adriano Celetanuo, The Beatlessua, Vladimir Kuzminua da Viktor Tsoidu kuullah nygöi karjalakse

levy Kägöi

Uuzi karjalankieline cd-disku Kägöi on piässyh ilmah. Keral on yksitostu mennyt vuozikymmenien popul’arnoi-iškelmiä, kudamat ollah kaikile ylen tuttavat. Nämmii ollah muun keskes Besame, Confessa, Yesterday, Käki da Simona.
Ideju cd-diskas tuli Olga Gokkoeval.
‒ Allus oli tarkoitus tallendua pajot da panna net Internettah. Enska Jakobson libo Jevgeni Bogdanov ehtotti diskan luadimistu, löydi planiiruiččijan da piiteriläzen yrityksen, kudamas diskat luajitah, Olga Gokkoeva kerdou.
Kaksi vuottu tagaperin yksitostu pajuo jo tallendettih. Tatjana Baranova on kiändänyh kai pajot livvin karjalakse
‒ Pajoloi ozutetah Anna Makarova, Natalia Zimina da Jevgeni Bogdanov. Yhten meloudien ozutti ansambl’u Belyi tanets. Diskua emmo silloi menestynnyh julguamah. Ideju jäi idämäh. Piätimmö silloi, ku yksi pajattai ozuttai kai 11 meloudiedu da sit julguammo diskan, pajoloin kiändäi Tatjana Baranova sanou.
Karjalankieline disku interesuiččou monii, enne kaikkie karjalankielizii kuulijoi.
‒ Suomes olen puaksuh kuulluh nygözien popu’arnoi-iškelmien suomenkielizii sovituksii. Olis mieldykiinnittäviä kuunnella nygöi karjalankielizii versielöi kannatettulois pajolois. Kaikis mugavimia kuunneltavua ollah sovitukset ven’alazis popul’arnoi-iškelmis. Net tunnutah kaikes yksinkerdazuos kui uuzil versielöil tuttavis meloudielois, petroskoilaine Jelena Krivtsova sanelou.
Meloudiet on tallendettu stuudies oraskuul 2017. Diskoi suau Karjalan Kielen Kois.
‒ Diskoi on vähäzel da tahtozimmo käyttiä suuriman ozan niilöis palkindoloinnu meijän pidolois da lahjoinnu omatahtozile i tugijoile, Olga Gokkoeva aksentiiruiččou.
Lähte: Karjalan Sanomat, Anna Umberg
Fotokuva: Karjalan Sanomat

Vastaa

Sähköpostiosoitettasi ei julkaista. Pakolliset kentät on merkitty *