Katalonien alovehhallindon johtai:”Tiettäväine rahvahaniänenando oli pädii”

Katalonies järjestetäh ylehine zabastouhku. Rahvahaniänenannon yhtevykses tiijustettu policiivägivaldu sellitetäh, Puigdemont sanoi.
Katalonien alovehhallindon johtai Carles Puigdemont kommentiiruiči, ku pyhänpiän pietty rahvahaniänenando oli zakonanmugaine, toizin kui Ispanien keskushallindo väittäy.
‒ Tiettäväine rahvahaniänenando oli pädii, Puigdemont sanoi enzimäsarren ildupäiväl.
‒ Myö olemmo suannuh moizen oigevuksen, ku meidy on kuultu, kunnivoitu da meijät on tunnustettu. Meil pidäy voija pakita abuu, suorah europpalazil institutsieloilpäi, Puigdemont pidi hommua.
Häi tovendi, ku ei ole sanomas julgi Katalonien iččenäzytty.
‒ Ispanien halličus on ellendännyh, ku soviettoin aigu on tulluh. Myö emmo tahto traumatičnoidu irdavumistu, Puigdemont rauhoitti.
Katalonien alovehjohtajan mieles Europan liitol pidäy ruadua välittäjänny Katalonien alovehhallindon da Madridan välil rahvahaniänenandokyzymykses.
‒ Ezitämmö vuoropaginua ilmai ehtoloi edukädeh, Puigdemont sanoi.
Häi tovendau, ku Katalonies järjestetäh ylehine zabastouhku tossarren.
Germuanien ulgoministru Sigmar Gabriel sežo vuadiu dialougua Katalonien da Ispanien hallindoloin välile.
Komissii sellittämäh vägivaldua
Katalonien alovehhallindo perustau tutkimuskomissien sellittämäh policiivägivaldua rahvahaniä
nenannon yhtevykses.
YK sežo kehoittau Ispaniedu tutkimah vägivaldua rahvahaniänenannon aigah.
Puigdemont sanelu, ku vägivaldazuksis sattavui 893 ristikanzua. Häi kuvaili pyhäpäiviä ”rahvahienvälizekse vägivallan päiväkse”.
Alovehjohtai sanoi, ku rahvahaniänenandamizen täh Katalonieh tulluzil policieloil pidäy lähtie alovehel iäre.

Katalonia 3.10.2017

Zabastouhkan allettuu tossarren tuhandet ristikanzat kerävyttih Ispanien rahvahallizen policien rakendukseh edeh afiššoinke. Erähäs lugii”Proššai Ispanii, kai menöy kohtalleh”.
Katalonies turistat kačeltih huondeksel, ku manifestatsien ozanottajat kulgiettih kunnallizen policien tyhjendettylöi dorogoi pitkin piäpoliciiazemale.
‒ Rahvahalline policii, rahvahalline huigei, manifestatsieh yhtynyöt kirruttih halličuksen delegatsien rakenduksen edes Barcelonas.
Saman aigazeh traktorat da rekat vuvvettih edenöin vauhtii da flaguloi heiluttajat ristikanzat maršittih pitkin Barcelonas Frantsien rajale vedäjiä N-2 motordorogua.
Manifestatsien ozanottajat vastustettih rahvahaniänenandopäivän aigua nähtyy policiivägivaldua da kannatettih Katalonien iččenäzytty.
Manifestatsieloi sežo Ispanien yhtenäzyön puoles on nähty ezimerkikse Sant Jaumen augivol Barcelonas, El Periodico -lehti sanelou, da La Vanguardia -lehti raportuiččou, kui läs 50 piädorogua Barcelonan da lähilinnoin välil oli salvattu ehtypäiväl zabastouhkan täh. Yhtehine transportu da taksiloin kulgemine sežo segavuttih Katolonien piälinnas.
Madridan linnanhallindos nelli viijes ruadajas ei ole olluh ruavos tossarren, sanelou linnanhallindo. Sežo jalgumiäččyjoukkoveh FC Barcelona yhtyi zabastouhkah, i muga ruattih palomiehetgi.
Ispanien kaksi tärgevindy ammattiliittuo UTG da CCOO ei tuveta zabastouhkua. Suuren tevollizuon tuotandos da Barcelonan El Pratan rahvahienvälizen aerodoman ruavos ei ole olluh keskustuksii.
Opastujil sežo oli manifestatsii, da tossarren ehtäl oli Katolonien iččenäzytty kannattajan organizatsien ANC:n suuri manifestatsii.
Äijät ammattiliitot da iččenäzytty kannattajat organizatsiet oldih kehoitettu omii ruadajii bastuimah.
Madridas Ispanien keskushallindo ajattelou tarkah Ispanien konstitutsien 153:n pygälän käyttöh ottamistu, ku Katalonie julgi sanonnuhes iččenäzekse.
‒ Se tarkoittas sidä, ku Katalonien avtonoumine stuatussu loppiettas ozittain libo kogonah. Madridan kontrolin jälgeh valmisteltas uuzi Katalonien valličus, kuvailou Ylen Barcelonas olii avvuttai Ismo Nykänen.
Pygälän perustehel Ispanien valdivo voi ottua käyttöh poikkevuksellizii da pakoittajii ruadoloi avtonoumizii alovehii kohtah, ku alovehien ruandu” varaitannou vagavah Ispanien ylehisty eduu”.

Lähte: Juho Takkunen, yle.fi, AP, Reuters
Fotokuva: yle.fi / Alberto Estevez / EPA Afišas lugou: Harjoitammo ičemiäriämisoigevutt

Vastaa

Sähköpostiosoitettasi ei julkaista. Pakolliset kentät on merkitty *