Egläi illal. Tuaste.

kid-2529907__480

Egläi illal. Tuaste.

Jogahine sen tiedäy
jogahine ristikanzu
tiedäy da ellendäy
kustahto syväl omas ičes
tundou
što

jumal on Jumal
da Sattan on sattan

što bohattu on bohattu
da köyhy on köyhy

što kentah on nälläs
da kudakel on syömisty
enämbi migu andau luvan nimi zakon

i kustahto on voinu (heil, sie loitton)
kustahto on rauhu (kui meilgi, nygöi), iänekäs
da yksikai heikko gu ristikanzan luajittu sobimus

i kentah suvaiččou, kustahto, toiči
i kentah vihuau, tiä, puaksuh, ainos

i puaksuh suvaičus
on enämbäl peitos
migu viha
da kačkerus
da voimattomus da kibu
da mängeh da kulakkoin iänet da ristikanzoin šittupaginat
da hil’l’u kuolemu

no sanon, sanommo
teile, meile ičele:
kebjiembi on ellendiä vahnan kl’onan elaigua
konzu se joga sygyzy pakuttau värii vaihtanuot lehtet
märräl nurmikole i hierun dorogale

muga: kebjiembi on ellendiä tämä
migu ellendiä Sattan da Jumal

ellendiä voinu da rauhu

ellendiä ristikanzoin torat da sovut

ellendiä nägyi da nägymätöi

ellendiä
pieni viha
da
Suuri Suvaičus

kui kentah toine enne minuu on kirjutannuh:
joga talvi panou samua lundu muah
no ainos ollah eri ristikanzat
ulgon tädä lundu syömäs

Lauri Luukkonen
Fotokuva: Pixabay

Vastaa

Sähköpostiosoitettasi ei julkaista. Pakolliset kentät on merkitty *