Ongo karjalan kieli digitualine?

logo DLDPThe Digital Language Diversity Project (DLDP) on jullanuh tuloksii omassah tutkindas, kudaman se luadi nelläkse vähembistökielekse (breton, baskin-, sardinien- da karjalan kieli) pagizijoin keskes. DLDP tahtoi tiediä kuibo ollah vähembistölöin digitualizet dielot.
Tärgevimät tulokset ollah tämänluaduzet:
1. Alovehellizikse da vähembistökielikse pagizijat tahtotah käyttiä heijän omua kieldy digitualizeh kaikil samoil sotsiolingvistiekallizil alovehil kui valdukielikse pagizijatgi.
2. Sotsializel meediel on suuret mahtollizuot ruadua kielen elvyttäjänny, ga tämä sotsiolingvistiekalline aloveh ainos vie on rajoitettu.
3. Alovehellizen kielen käyttyö julgizel alovehel tahtotah ližätä.
4. Vähembistökielikse pagizijoi pidäy rohkata da avvuttua käyttämäh omii kielii digitualizil alovehil. Hyö ollah tärgiet digitualizen syväindön luadijat.
5. Nämien kielien pidäy suaja yhteiskunnan tugie kaikil tazoil. Niilöin digitualine kehitändy ei menesty, ku ruado jätetänneh vaiku omatahtozile aktivistoile.
Karjalankielizien ozal tutkimukses menöy selvile, ku karjalakse pagizijoil on ylen hyvä kielelline ičentundo da sendäh hyö tahtotah käyttiä kieldy sotsializes verkos. Se on ylen tärgei dielo karjalan kieldy elvytettäjes, konzu kai pagizijat ei eletä samas kohtas. Verkon käyttäjil ei yhtelläh ole tieduo kaikis digitualizis alovehis kudamat ollah karjalakse. Tämän ližäkse heil puaksuh on viäriä tieduo nämmien lähtehien olemasolos.
Sotsializen verkon käytön konah karjalan kieli on rajoitunnuh facebookah. Tämä voi roita eri syylöis: facebookal on käyttäjiä kaikis rahvahaliston joukkolois, da tämän ližäkse facebook on pädii levieh, rajas yličigi tapahtujah kommunikatsieh. Tilandeh ei tovennägözeh muutu ylen terväh, ku karjalan kielen käyttämine facebookas, twitteras da instagramas lizävynnöy da ku nuoret kiinnitettäneh mieldy kieleh i ruvetah käyttämäh sidä da ku ruavot kielen elvytykseh näh suadaneh parembua nägyvysty Suomen poliittizis paginois.
Tulokset aksentiiruijah selgieh sidä, ku karjalan kielen käyttäjile pidäy andua tieduo kaikis sotsializen verkon alovehis, kudamat ollah karjalakse. Karjalakse pagizijat hyövyttäs karjalankielizis verkosanakirjois da wikipedies, ku heil ollus niilöis tieduo. Tuloksien mugah ristikanzat sežo ei tietä, ku tiedokonehen näppäimistön azetekset on helpo muuttua karjalakse kirjuttamizeh sobivakse. Karjalakse ei tiettäväine kirjuteta, ku se ollou vaigiedu da sendäh heile pidäy andua tieduo mainitus azies.
Lähte: DLDP

Vastaa

Sähköpostiosoitettasi ei julkaista. Pakolliset kentät on merkitty *