Rastavanlahjudengu

popup-paginpertiParluamentu hyväksyi 21.12.2016 valdivon budžetan vuvvele 2017. Samoiten hyväksyttih joukko miärydenguližävyksii, kudamis halličuspuolovehet oldih sovittu keskenäh libo ms rastavanlahjudengoi. KKS:le annettih 100 000 euron miärydengu karjalan kielen da kul’tuuran elvytysohjelman alguh panoh niškoi. Perussuomelazien deputuattu Pentti Oinonen luadi syvyskuul budžettuinitsiatiivan, kudai jälgimäi vedi ylen hyväh lopputulokseh. Oinonen on jättänyh vuozien varrel äijy karjalan kielen stuatusan kohendamizeh tiähtiäjiä initsiatiivua, ga ilmai tulostu. Täl kerdua initsiatiivu vedi tulokseh, sendäh ku perussuomelazet ollah halličuspuoloveh. Perussuomelazet ministrat da parluamentujoukko kannatettih lujah miärydengua da jälgimäi se hyväksyttih. Menestymine ei olluh ičestäh selvy dielo, ku tädä lizävysty vastustettih lujah. Sit on ozutuksennu jo se, ku parluamentu ei ottanuh seuran ezitettyy miärydengua omah budžettuezitykseh, hos ohjelman alguh panendas oli pietty soviettua läs kaikkien puolovehien johtonke da kai oldih ilmoitettu, ku hyö kannatetah ohjelmua i valdivon tugie sen todevuttamizekse. Kui tavallistu, jogahizel hankehel on läs kaikis puolovehis omat kannattajat da omat vastustajat. Täl kerdua vastustajat puututtih hävivöh. Karjalan kielen tugijoin joukko on vuozien varrel kogo aijan kazvanuh da erähät puolovehet kui ezimerkikse vihandat i perussuomelazet ollah otettu omih puolovehohjelmih karjalan kielen dieloloin ajamizen. Nygöi on jogahizes puolovehes monii deputuattoi, kudamat ollah valmehet kannattamah karjalan kielen stuatusan kohendamistu.
Elvytysohjelmu pannah alguh hedi vuvven allus da toimindu suundavuu tavallizih karjalakse pagizijoih da eri igäjoukkoloih. Muun keskes perustetah liziä kieli- da kul’tuurukerholoi, päivykodigruuppoi, opastusjoukkoloi školih da aiguzien opistoloih dai organizuijah toimindua vahnembih karjalazih niškoi. Ližäkse seuru kohendau opastajien opastustu da luadiu ližiä julgavuo, piäazies livvikse da suvikarjalakse, luadjijakseh karjalan kielen da kul’tuuran elvytändän tevokkahambakse.

Yksi kommentu “Rastavanlahjudengu

  1. Ylen mielužu rastavanpodarku, da ylen tärgie konzu duumaičemmo karjalan kielen tulevazuttu . Parahat passibot Pentti Oinozel, gu häi jo äijy vuottu on pidänyh ezil tädä meijän dieluo!

Vastaa

Sähköpostiosoitettasi ei julkaista. Pakolliset kentät on merkitty *