Näimmökseh virtualizes paginpertis

opastajatnet
opastajat.net-paginforumu

Karjalankielizien tavanomaine probliemu on se, ku himoittas paista karjalakse no ei ole kenen kel paista – lähäl ei elä nikedä karjalan pagizijua (libo ei tiijä ku eläs). Opastajat.netan paginforumal da Facebookan libo Vkonktakten joukkolois voibi kirjuttua karjalakse (ezim. Facebookas Opastummo / Opassummo / Opassumma karjalua! da Karjalaa oppimaan – livvikse! Vkontaktes Onko karjala siun oma kieli? da Paginkanzu). Facebookan da Vkontakten joukkolois kirjutetah äijän sežo suomekse da ven’akse, ga parembi olis min enämbi rahvas karjalakse kirjutettas. Opastajat.netan paginforumas on hyvä, ku ei vaiku kirjutukset ga kai ymbäristö on karjalankieline. Vkontakten da Facebookan karjalankielizii versielöi meil pidäy vie vuottua. (Sanakse, Vkontaktie parahuolleh kiännetäh karjalakse, Facebookan kohtal vuotetah ku ližättäs karjal kiännettävien kielilöin luvetteloh.)

Ga internetači voibi ei vaiku kirjuttua ga paista. Yksi suurembale joukole tuttavis programmois on Skype. Skypeči toine toizenke yhtevyös olemine ruadau kudakui telefonan jyttyöh: yksi zvoniu toizele, toine ”vastuau”, hyväksyy yhtevyön omal konehelpäi. Pidäy tiettäväine olla mikrofon da kameru, ga kannettavis tiedokonehis net tavan mugah ollah valmehennu. Skype voibi olla kui tiedokonehel mugai telefonas. Skypesgi voibi paista joukol: sanotah buito voibi jagua yhtevyön kai kymmenele ristikanzale, no suozitus on ei enämbi viitty hengie. Ga Skypeh pidäy tunnukset, da pidäy ennepäi tiediä kenele ”zvoniu”: pidäy skypetunnuksen vuoh kuččuo da hyväksyö toine omah kohtaktoin luvetteloh.

virtualinepaginperti
Välil voibi olla sadoi kilometrilöi, ga yksikai voibi paista rouno ku yhtes pertis

Aku ei olle tiijos kenele zvonie, voibi kačahtuakseh virtualizeh paginpertih ollusgo sie kedätah kenen kel karjalakse paista. Virtualizeh paginpertih ei pie tunnuksii, pidäy vaiku puutuo sivule www.karjal.fi/paginperti. Sivun alahan löydyy karjalakse ohjavot kui sidä käyttiä. Virtualine paginperti ruadau Tinychat-palvelun vuoh da se on avvoi kaikel aigua. Tinychattih pohjuajas virtualizes paginpertis voibi olla kameranke yhtenaigazes kuvayhtevyös kaksitostu ristikanzua, ga sen ližäkse paginpertis voibi olla äijiä enämbi rahvastu kuvayhtevyöttäh.

Ket tahtozitto paista karjalakse toizien kel – kirjuttakkua tämän kirjutuksen ual kommentoih konzugo piäzettö oppimah paginpertii, sit sinne voibi puutuo sil samazel aigua toizetgi rahvas. Näimmökseh virtualizes paginpertis!

Vastaa

Sähköpostiosoitettasi ei julkaista. Pakolliset kentät on merkitty *