Karjalankielisty karaokie Rastavaniellizes illanvietos pajatettavakse

Youtubes voibi pajattua karaokevideon vuoh karjalankielisty pajuo ’Kaikin tänäpäi ollah hyväs mieles’. Alguperäine versii täs pajos on anglienkieline ’It’s beginning to look alot like Christmas’. Sen kirjutti vuvvennu 1951 Meredith Willson. Pajos on luajittu ezimerkikse suomenkieline versii ’Taasen joululta kaikki alkaa näyttää’, kuduan sanat on Vexi Salmen kirjutetut. Ga suomenkielisty versiedy odva voibi sanuo kiännöksekse: sit on sama muuzikku, no sanat ollah ihan toizet.

Anglienkieline versii sanelou sih näh, kui ymbäril jo nägyy lähenii pruazniekku: pihal čomendustu, bobastu laukan tävvet, midä se da tämä ristikanzu tahtou lahjakse, da vahnembat odva-odva voijah tirpua kuni škola loman jälles algau. Ga puuston suuri puu lumiturkinke mustoittau Rastavas, da terväh kellozet soitetah Rastavan pajoloin täh. Suomenkielizes versies čomendettu Rastavan kuuzi vedäy lapsusmustoloih: kui tuohukset sytyttih, savvule tulii kyly vuotti kylbijiä da oli stola täyzi syömisty, ga ei voinuh ni syvvä, ku vuotti Rastavan ukkuo da midä häi tuou lahjakse.

Karjalankielizen versien sanat kirjutti Maria Kähäri. Segi versii ei ole toven kiännös. Karjalankielizes versies sanellah sih näh mittumale Rastavannu tunduu, midä nägyy, midä kuuluu da mille tulou nenäh. Ga Kähäri luadi sen piädykauti  muga, ku pajos nikerdua ei sanota Rastavu. Sit se samaine pajo onnuako pädis pajatettavakse kuuzipruazniekan iel rippumattah sit ongo se kuuzipruazniekku Rastavu libo Uuzi vuozi.

Pajattakkua yksin libo yhtes

 

Vastaa

Sähköpostiosoitettasi ei julkaista. Pakolliset kentät on merkitty *