On pandu alguh kampuanii ”Miljounu kymrin pagizijua”

KymriKieliliikeh tahtou ku tulijua Kymrinmuan halličustu luajittajes ližättäs huomivuo kymrin kieleh. Sendäh Kymrin kielen seuru panou alguh Caerdyddis kampuanien nimel ”Miljounu kymrin pagizijua”. Tulieloin kuuloin aijannu hyö kierretäh Kymrinmuadu autobussal ku kiinittiä rahvahankerähmövalličendois enämbi huomivuo kymrin kieleh, sanelou seuran paginanvedäi Jamie Bevan.

Kampuanien tärgevimät tavoittehet ollah kymrin kielen pagiziiluvun nostamine miljounah, muaspäimuuton azettamine da kymrin kielen käyttämine kaikil eloksen alovehil. Mulloi kieliliikeh ezitteli puolovehile kieleh liittyjii kehoituksii sižäldäjän poliitillizen programman. Yksi nämmis kehoituksis oli muuttua školaopastustu muga, ku jogahine nuori ristikanzu Kymrinmuas opastus kymrin kielel. [Ku kaikis Kymrinmuan školis vähimyölleh vuitti opastusainehis opastettas kymrikse. Nygöi kudakui nelländesvuitti kymrinmualazis školniekois opastuu kymrinkielizes školas, kuduas kai ainehet libo suurin vuitti ainehis opastetah kymrikse. Dostalit ollah školis, kudualois kymri on vältämättömänny ainehennu toizennu kodimuazennu kielenny, no kai muut ainehet opastetah angliekse.]

”Kymrin kieli ei ole suanuh kylläl huomivuo aijembien rahvahalliskerähmövalličendoin aijannu”, sanou Kymrin kielen seuran paginanvedäi Jamie Bevan. Häi sanelou ku tahtou nähtä kymrin kieldy koskijan ”tarkan da pitkyaigahizen” pluanan Kymrinmuan tulijan halličuksen programmas. ”Myö tahtommo, ku jogahine puoloveh julguau yksityiskohtazemban pluanan migu aijembi. Rahvahan pidäy piästä pagizemah sit, mi on paras metoudu täs ielleh.” Häi toivou, ku heijän bussukierdomatku tulou nostamah tieduo ”kymrin kieleh huomivon kiinnittämizen tärgevyös”.

Häi sellittäy, ku heijän kehoitus kielipoliitillizes programmas ”Miljounu kymrin pagizijua: poliitiekku vuvves 2016 ielleh” pohjuau paginoih, kudualoi on pietty Kymrin kielen seuran keskes dai kielipoliitiekan spetsialistoin kel. ”Tuliet valličendat ollah rešaiččii aigu kielele”, häi sanou da viittuau vuvven 2011 rahvahanluvun tuloksih. [Rahvahanluvendu ozutti muun mugah, ku suurel vuitil kymrin kielen perindöllizesti lujas paginalovehes kielen pagizijoin relatiivine vuitti rahvahas oli merkittäjäh vähendynyh jälgimäzen kymmenen vuvven aijannu.] ”Meil pidäy olla rahvahannu kunnivonhimuo turvata kymrin kielen hyvin menendy tulieloinnu vuozikymmeniny. Rahvahan da poliitiekoin piädy levendiä heijän nägöalua.”

”Pidäy ruadua miärytegoizeh selgielöin pluanoin da poliitiekan mugah. Otettannuhes meijän poliitiekot vagavah kunnivonhimozih tavoittehih puutumizeh, pidäy rohkieloi piätöksii zakonanluajindas, resursoi da rahvahan tugie planiruitajes dieluo ielleh.”

Lähteh: Lansio ymgyrch ‘Miliwn o siaradwyr Cymraeg’ 3.2.2016
[Salbavomerkilöis olijat kommentat suomalais-ugrilazien kielien opastui da vähembistökieliaktivistu Jani Koskine]
Kuva: Kymrinmua libo Wales Europan kartal, commons.wikimedia.org Alphathon (Cc-by-sa)

Vastaa

Sähköpostiosoitettasi ei julkaista. Pakolliset kentät on merkitty *