Rahvahallizien vähembistölöin vaikutusvaldu kazvau Europas

Pertti Lampi

SNP_logotiippuSuomesgi välil paistah rahvahallizien vähembistölöin vaikutusmahtollizuksis. Monile on histouries tuttavua se, ku Baltien germančoil eliital oli valdutila vuosisadoin aijan. Pieni vähembistö haldivoičči ičevaldazeh estounielazii, latvielazii da litvalazii dai nämmien mualoin etnillizii vähembistölöi. Suomes sežo oli ruočinkieline vähembistö vallas aiven 1900-luvun alguhsah. Sih suate suomenkielizet i etnillizet vähembistöt oldih toizen klusan kanzalazet meijän muas. Muijal muailmas on vie valdivoloi, kudamis haldivoiččou vähembistöeliittu.

Europas on tilandeh jo hätken olluh eriluaduine. Yhtenjyttysty vähembistölöin ičevaldua ei enämbi ole ihan nimis. Aijembah alendetut vähembistöt voijah nygöi vaikuttua omassah muan poliitiekkah hyvingi piättäjäh tabah. Ispaanien kataluanat ollah hyvä ezimerki. Tänä keviänny ollah šotlandielazet viegi vaikutusvaldazembas tilas. Brituanien oraskuun allus piettäjien parluamentuvalličuksien yhtevykses voi Šotlandien piäministru da rahvahallispuolovehen johtai Nicola Sturgeon käytändös piättiä sen, ollahgo halličusvastuos valličuksen jälgeh konservatiivizet vai ruadorahvahanpuoloveh. Rahvahallispuoloveh suau ennustehien mugah 50 paikkua Brituanien parluamentah da nouzou nenga ollen ”kuningahan luadijakse”, ku piäpuolovehet ollah kannatusmiärävölöis läs tazaverdazet. Brituanien kehitys ennustau leviämbiä muutostu Europas. Endizet valdukunnallizet puolovehet ei enämbi yksin miärätä valdivoloin tulevazuos. Ei aivengah semmozis mualois kui Ispaanii da Brituanii, kudamis eläy monii rahvahallizuksii. Vähembistöt nostah kogo aijan vaikutusvaldazembah tilah, da niilöin iändy pidäy kuunnella. On selgei, ku tämä kehitys vedäy vähembistölöin tilandehen kohendumizeh kaikis meijän muanozan mualois da sežo Suomes. Tämä tarviččou yhtelläh sidä, ku rahvahallizet vähembistöt tavoittehenmugazeh ajetah omua aziedu. Enämbiä ei voija olla tyydyväzii sih, kui Suomes ollah, ku poliitikat i virguniekat luajitah sellityksii da ohjelmoi, a ruatah käytändös ihan toizin. Nenga tapahtui ezimerkikse saamilazien ILO-sobimusazies.

Kuvan logotiippu: Šotlandien Rahvahallispuoloveh, Scottish National Party, Pàrtaidh Nàiseanta na h-Alba

Vastaa

Sähköpostiosoitettasi ei julkaista. Pakolliset kentät on merkitty *