Konzu muga sanotut vahnat karjalazet järjestöt luovutah Karjalan heimo -ellendyksen käytändäs?

Pertti Lampi

Europas i sežo Ven’al karjalazii on pietty omannu kanzanah ja karjalan kieldy omannu kielenäh monien sadoin vuozien aijan. Suomen kanzallismieline organizatsii on 1800-luvul lähtijen sanonuh varmah vastastu läs nämmih päivih suate. Ihan hyö otettih käyttöh ellendyksen Karjalan heimo. Tämä ellendys on ainos vai käytös ms. vahnois kanzalaisjärjestölöis da nimittumii merkilöi sen käytös luobumizes ei ole nägyvis. Nuoloi järjestölöi ei ole äijän liikutannuh tazavallan prezidentan aktu vuvvel 2009 karjalan kielen vähembistöstuatusas da ni Europan Nevvoston piätös hyväksyö Suomen karjalankielizet karjalazet Kanzallizien vähembistölöin suojeluu koskijan ramkuyleissobimuksen piirih.

Aijat muututah, ga nuoloin järjestölöin nägökannat da käytändöt ollah ainos vie 1930-luvul. Sen verran on pietty silmäl nygyaijan kehityssuundii, ku juuret Karjalas -ellendys on nygöi käytös. Se tarkoittau, ku karjalazet ollah ainos vie heimoltah karjalazet da / libo heil on juuret Karjalas, ga hyö ollah juuri suomelazet. Toizin sanojen nimidä karjalastu identitiettua ei ole da ei ni roi. Pidäy mainita, ku Ven’an karjalazil alovehil dielot kehitytäh samankaldazeh tabah. Ven’an karjalazil pidäy enzivuoroh olla Ven’an karjalazii, paista ven’akse da suvaija ven’alastu kul’tuurua. Heil voibi olla karjalazet juuret, gu hyö muga tahtotah. Karjalan kieldy da kul’tuurua voibi suvaija silloi tällöi mennyzyöh liittyjäl kaijal alovehel.

Jogahizel dieluo syväh ajattelijale, on selgei, ku karjalazil järjestölöil pidäs terväh luobuo vahnavunnuon heimoellendyksen käyttämizes sendäh, ku se vahingoittau karjalazien da enne kaikkie karjalankielizien dieloloin ajamistu. Vastustajat suajah heimoellendykses ylen hyvän hengentoravehkehen uvvistuksii vastah. Oza heis on puaksuh kyzynyh minul kudamahlienne niilöi vähembistöoigevuksii da uvvistuksii tarvitah, ku oza karjalazis on omassah mieles suomelazii.

Vastaa

Sähköpostiosoitettasi ei julkaista. Pakolliset kentät on merkitty *