Karjalan kielen da kul’tuuran elvytys edeh parluamentuvalličuksen jälgeh

Piäkirjutus 2/2015

Valličus on pietty da uvven halličuksen luadimine on alganuh. Karjalankielizile uuzi tilandeh andau myös mahtollizuon kohendua omua stuatussua. Tottu ei iellinegi halličus da parluamentu pietty karjalazii pahoi. Monet aziet todevuttih. Nenga sitgi huolimattah, ku vastustajoigi virguniekkoin da poliitikkoin joukos oli. Tärgevimät suavutukset oldih halličuksen annettu elvytysmiärydengu da vähembistölehtien tugi meijän lehtele.

KKS on jo pari vuottu pidänyh sovittua puolovehjohtajoin da ministroin ker karjalan kielen i kul’tuuran elvytysohjelmas, kudai on tarkoitus algua jo vuvven 2016 allus. Kohtavumine on olluh ylen myödymielisty da piättäjät ollah oldu valmehet ottamah elvytysohjelman uvven halličuksen toimenpidoluvettoloh. Nygöi alletah piättäjät sovietat azies da luvatut pidäy täyttiä.

Seuran ohjelmu on ominazuksien mugah eriluaduine kui saamin kielen elvytysohjelmu. Nečen hankehen todevuttamine on liijan lujah sivoksis virguniekkoin, enne kaikkie opastus- da kul’tuuruministerstvan , ohjavoh. Tämän täh ohjelmu lähti käyndöh ylen hil’l’ah da todevutus menöy hil’l’azeh.

KKS:n ohjelman todevuttajannu on vähembistö iče, libo karjalankieline kollektiivu. Virguniekkoin da enne kaikkie OKM:n kel ollah yhteisruavos i ministerstvu on ezimerkikse hankehen johtojoukos. KKS todevuttau viizivuodehizen projektan yhteisruavos muuloin karjalazien järjestölöinke halličuksen annetun abudengan turvin. Sen lizäkse ohjelman mugazii kohenduksii luajitah virguniekkoin piätöksih, normih da sellityksih. Kohenduksii vuadijoi sektoroi ollah ezimerkikse karjalan kielen ottamine huomavoh aigaskazvatukses, perusškolas i toizen tazon opastukses, vahnoin huollos sego YLE:n ruavos. Miärydengu vuadiu käytändönruavon lizäkse karjalazien omua panostu varoin hommuamizes. Varoi pidäy hommata dengufondil, fondil, biznessyelokses da Europan Liitol. Kyzymyz on sit suures ruavos, kudaman voi todevuttua vai karjalazien hyväl yhteisruavol. Elvytysohjelmu kohendau viijes vuvves piättäih karjalakielizien stuatussua Suomes. Sikse täh vuadijah, ga andoizah hankeheh maksau ottuakseh.

Kuva: Wikipedia, Akseli Gallen-Kallela: Sammon tagomine 1893

Vastaa

Sähköpostiosoitettasi ei julkaista. Pakolliset kentät on merkitty *