Maťťi Jeskańi, tovellińi karjalan kielen ažientundija

matti-jeskanenMaťťi Jeskańi on voikoi karjalan kielen pagizija da kirjuttaja. Konza kui pidäh suaha tovellińi azientundija ezitelmöimäh karjalan kieles, kutšutah Maťťi abuh. Viimeksi valdiovalda andoi Jovenzuun yliopissol ruaďieksi selvittiä, kui äijäl löydyy Suomes karjalan kielel pagizijua.

Yliopisto kiändyi Jeskazen puoleh. Häi tutki da luaďi raportan 2004. Sen peräh ruvettih vasta uskomah, sto Suomes on karjalan kielel pagizijua ainagi 5000 hengie. Dai saimmo siit ei alovehellizen vähemmistökielen statuksen 2009.

Maťťi Jeskańi on Ilomantšin brihoi. Hänen roindapäivä on pakkaskuus 1940. Maťťi kiinnostui karjalan kieles nuorenna. Sih aigah erähät ilomanttšilazet vanhat rišťikanzat vie paistih äijävähä karjalua, hos muiten oľi suomen kieli jo vallal. Professor Virtaranta kuttšui  Maťin jo 1963 Karjalan kielen sanakirjan toimitukseh. Siid Maťťi käveli pagizuttamas da tallendamas iäńitteheksi karjalazien eländiä.

Maťin kyńäs on piässyh lugiettavaksi monet ezipuhiet da tekstat eri kńiigoih. Häi on vuozikymmeńie luvennoinuh da opastannuh karjalan kieltä. Yhtehizenä ruadona Jovenzuun da Petrozavoskin yliopisson ker Maťťi  oľi  toimittamas 1994  kńiigua ”Näytteitä karjalan kielestä I ”. Häi ruadoi dai tutkijanna Tverin yliopissos monda vuotta.

Vie vois maińita Maťin ruaďielois Karjalan Kielen Seuran perustamizen Jovenzuus 1995. Hänen johol luajimmo siännöt da Maťťi  vaľľittih dai enzimäzeksi seuran paginanvedäjäksi.  Vägi tukul oľis vie kirjutettavua Maťin anziolois karjalan kieleh näh, vai jo iel kirjutetus voimmo sanuo händä tozi karjalan kielen ažientundijaksi.

Andakkah Spuassa tervehyttä da pitkiä igiä ehki Maťin  jalga šaugais da kieli ńaugais vie mońie vuozie karjalan kieltä puoľistajes.

Paavo Harakka

Vastaa

Sähköpostiosoitettasi ei julkaista. Pakolliset kentät on merkitty *