Karjalazus eläy Ruočis

Ruočin piälinnas Tukholmas kahten päivän aigah, 13.-14. oraskuudu, piettih karjalan kielen kursit. Niilöin järjestäjänny oli Vallentunas toimii Ruočinsuomelaine kultuuruyhtistys, kudai oppiu pidiä silmäl karjalan kieldy da karjalazuttu Ruočis. Tottu sanuo tädä ruaduo karjalan kielen da karjalazen kultuuran hyväkse ruadau yksi ainavo inehmine Eila Pöllänen. Eilal on karjalazet juuret. Karjalas, Suomes da Ruočis händy hyvin tundietah. Ylen äijän häi on auttanuh karjalazii kielidielolois.Hyvin tundietah Eila Pölläzen pajotgi, kudamii häi monen vuvven aigah pajattau oman tyttären Elinan kel karjalakse.

Täl kerdua karjalan kielen kursiloile tuli äijy rahvastu, emmo ni smiettinyh ku muga äijy tulou. Hyviä mieldy oli vie sendäh ku karjalan kieli kiinnostau nuordu polviegi, oli kursilazien joukos nuordu tyttyö da brihua.

Opastamah karjalan kieldy kursiloile tuli Jelena Filippova Petroskoispäi. Pidäy sanuo, ku Jelena kursiloin aigah pagizi vaiku karjalakse, se tottu kursilazile oli mieldy myöte. Hyö suadih kuulta puhtastu karjalan kieldy da ellendiä sen čomuon. Kursiloin aigah opastujat kačottih vähäzen kielioppii, opastuttih oigieh sanomah karjalan kielen iänii da pagizemahgi, yhtes opastajan kel kačottih monii paginaihieloi.

Enimil karjalan kieldy opastumah tulluzil ollah karjalazet juuret, kenengo vahnembat da buabat da died’oit rodivuttih Karjalas, kenengo Karjalan kannaksel. Tänäpäi heijän jälgeläzet tahtotah opastuo karjalan kieldy, tiediä enämbi omien ezi-izien perindölöis da tavois.

Kai kursilazet oldih sidä mieldy ku kursiloin piendiä pidäy jatkua. Tuliel hyö ruvetah kerävymäh yhteh toinah kerran kuus, sit yhtes pajatetah, lugietah runuo da Oma Mua –lehtie, kudaman sanakse erähät ollah tilattu kursiloin aigah. Muga ”Omal Mual” rodih lugijua Ruočisgi dai näemmö, ku Ruočisgi eläy karjalastu, kudamat tahtotah maltua omien ezi-izien kieldy da kehittiä karjalazuttu täs muas.

Iče Jelena Filippova on livgiläine. Häi on roinnuhes Anukses, hänen perehes kaikin – muamo da tuatto, buabat da died’oit – ollah karjalazet da paistah karjalakse. Tänäpäi Jelena ruadau Oma Mua -lehten toimitukses. Lehti on livvinkieline da piäzöy ilmah Petroskois.

Kursiloin aigah, opastundan jälles, piettih karjalazet illačut. Pajattamas illačus oli Eila Pöllänen da hänen tyttäreh Elin. Runuo karjalakse lugi da pajattigi karjalaine runoilii Ivan Savin. Häi myös on petroskoilaine. Illačus kursilazet ozutettih vie pieni ozutelmu karjalakse, sen opastuttih yhtes opastajanke. Aiga hyvin hyö maltettih ozuttua se, illaččuh tulluot suadih kylläl nagrua, ku ozutelmu oli aiga kummakas. Tämän jälgeh kaikin yhtes pajatettih pajuo karjalakse.

Ivan Savin,

Tuhkolmaspäi

tel. +79214513227

Vastaa

Sähköpostiosoitettasi ei julkaista. Pakolliset kentät on merkitty *