Uuttu karjalankielisty lapsienmuuzikkua – Kristiina Olanto & Lekkujad: Metrolla buabon luo

Karjalan kielen päivänny 27.11.2019 Karjalan Kielen Seuru julguau uvven vesselän lapsiendiskan Metrolla buabon luo. Pajozii täs pajattau Kristiina Olanto yhtes oman Lekkujad-yhtyvehenke, da diskan tuottajannu on karjalan kielen da kul’tuuran elvytysprojektan koordinuattoru Heini Karjalainen. Diskal on 15 tuttuu lapsienpajuo, kuduat on kiännetty karjalakse. Pajostu löydyy täs joga kolmel Suomes paistaval karjalan kielen murdehel: vienan-, suvi- da livvinkarjalakse. Pajotekstoin kiännökset ollah luajittu Katerina Paalamo, Olga Karlova, arhijepiskoppu Leo, Heikki Koukkunen, Maria Kuismin da Ritva Lampivuo. Karjalankielizet pajotekstat on painettu diskah kuulujah tetrattizeh. Diskas lövvät pajuo joga maguh: uinotuspajozes rokkipajossah.

Diskan tarkoituksennu on tugie lapsii opastundas da harjavundas karjalan kieleh. Tutkimuksien mugah muuzikku da pajatandu ylen hyvin vaikutetah aivoloin ruandah da ristikanzan opastundah. Lapsienpajot avvutetah lastu ellendämäh kielen vaigieloi piirdehii sego panemah mustoh uuttu sanastuo da uuzii rakendehii. Muuzikku eistäy edehpäi kui muamankielen mugai muijien kielien opastundua. Uuzi disku pädöy kaikkile karjalazile lapsiperehile sego karjalan kielen opastujile da opastajile ezimerkikse kerholoih, päivykodiloih, školih dai karjalankielizih muuzikkukižaškolih.

Diskan nimen andai Metrolla buabon luo sanou sit, kui nygözet karjalankielizet lapset ei ajeta buaban luo hebozel, ga mennäh hänellyö metrol. Karjalan kieli voibi eliä da kukkie kirjavah modernoisgi muailmas. Aja sinägi buaballuo metrol!

Tekstu: Heini Karjalainen & Natalia Giloeva

Kristiina Olanto & Lekkujad: Metrolla buabon luo

CD: Metrolla buabon luo
Artistat: Kristiina Olanto & Lekkujad
Iänitys, miksavus da muasteroičendu: Maailman Musiikin Keskus, Reima Tuovinen
Tuottai: Heini Karjalainen
Juandu: Karjalan kielen seuru
Kuvittai: Hilla Palojärvi
Taittai: Ilona Pelgonen
Kielentarkistus: Natalia Giloeva & Heini Karjalainen
Seuran verkolaukku: http://www.karjal.fi/kks/shop/
Diskukoudu: KKSCD-002
15 kappalehtu, kogonaine kesto: 38’03
Hindu: 20 €

Vastaa

Sähköpostiosoitettasi ei julkaista. Pakolliset kentät on merkitty *