Tansi on hyväkse aivoloin tervehyöle

Tansimine käzittelöy aivoloin valgiedu ainehtu, vähendäy stressua da kohendau tazapainuo. Tansin aivoloin tervehytty parandajat vaikutukset nävytäh daže vahnannuzien tansii suvaiččijoin aivokuvis.

tanssi 2
Val’sii, tanguo, pol’kua… Tansiluaduloin joukko on suuri ‒ da paras dielo on tämä: net kai ollah hyväkse meijän aivoloin tervehyöle, ku harjoitammo niilöi  da tansimme alalleh vähäzen da hos kois.

 
WiseMoti Communityn perustai, filosoufien douhturi Hanna Poikonen sanelou, ku tansii on tutkittu neirotiijos vähembi migu muuzikkua, ga nygöi jo tietäh, ku tansi toven parandau aivoloi. Tansi yhtistäy aivoloin eri oza-alovehii toine toizeh da on tovendettu, ku sendäh se kohendau mustuo.

 
Tansin aigua rungan da aivoloin yhteisruado käzittelöy aivoloin biomarkeriloi, libo ihan niilöi kudamat muututah ezimerkikse Alzheimeran libo Parkinsonan taudiloin periä. (Biomarkeriloi voijah olla ezimerkikse molekulat,solut, organizmat, protejiinat da hormonat. Niilöi voibi käyttiä tovestamah ymbäristön libo organizman herkenemisty vierahale ainehele libo vierahan ainehen vaikutustu mainittuh ymbäristöh libo organizmah).

 
Poikosen mugah tutkittajes kävelyy, vönyttelyy da tansii suvaiččijoin vanhannuzien ristikanzoin aivoloi, vaiku tansijoin aivolois nägyi, ku valgien ainehen yhtenjyttyzys oli lujennuh. Tansin hyvä vaikutus nägyi aivokuorel. Aivokuori kerävyy valgies ainehes, kudai tuou viestilöi aivoloin mustokeskuksespäi.

 
Tietäh, ku valgien ainehen yhtenjyttyzyön miäry vähenöy ijän mugah, da se väheni sežo tutkimukseh yhtynyzil kävelijöil i vönyttelijöil.
‒ Tutkimustulos oli sendäh hämmästyttäi: Tansi ei vaiku hillendännyh valgien ainehen vähenemisty, ga vie ližäi sen miäriä vahnannuzien tansijoin aivolois.

 
Lähtehet: Essi Kähkönen, aivoliitto.fi da Tieteen termipankki

Fotokuva: Pixabay

Vastaa

Sähköpostiosoitettasi ei julkaista. Pakolliset kentät on merkitty *