Šyyšlomaleiri Oulušša

Männä netälillä Oulušša piettih šyyšlomaleiri, kumpaseh ošallissuttih lapšet ta aikuhisetki. Leiri piettih nellänäpiänä ta piätinččänä Aleksinkulman tiloissa.  Leirissä oli yhekšän eri-ikäistä lašta ta melkein šaman verran oliki aikuhisie.

Leirin aikana lapšukkaiset ta aikuhiset laulettih, leikittih, luvettih ta kuunneltih šuarnoja, piiruššettih, arvautukšie arveltih, leikkilukuja opittih ta vieläi sriäpittih.

šuarnoja
Kuvašša: Lapšukkaiset kuunneltih šuarnoja.

Nellänäpiänä kaikki yheššä luajittih šuolataikinašta kalittoja ta marjapiiraita, kumpaset oltih valmehet vašta šeuruavana päivänä. Piirakkojen värittämiseššä lapšet šuatih kyllä käyttyä mielikuvituštah!

Leirin aikana jokahisella oli mahollisuš kuot’ella iččieh näyttelijänäki. Muhahuš-leirin teatterin ohjelmašša oli kakši lyhykkäistä ta  vesselyä näytelmyä. Yksi näytelmä oli luajittu  “Kontie ta repo” -šuarnan mukah. Tämän näytelmän kautti ošallistujat šuatih tietyä, mintäh kontiella on lyhyt häntä. Toisen näytelmän nimi oli “Nakrisstarina”. Täh näytelmäh ošallistu jokahini paikalla olija.

Nakrisstarina
Kuvašša: Näytelmä ”Nakrisstarina”

Kahešša päiväššä leikkimällä opittih kuukaušien nimet, värien nimijä, eläimien nimijä ta äijän muutaki. Lapšet kummaššeltih, jotta “punainen” on karjalakši “ruškie”, a “ruskea” on “pruuni” tahi “makšankarvani”.  Šepä oli heilä vesselä!

Lapšet tykättih olla leirissä ta toivottih, jotta leiri jatkuis vielä. Leirin lopukši jokahini lapšukkaini šai pienen lahjanki, missä oli Rohkie tijani -kirja.
–Tämä on elämäni paraš päivä! šano yksi lapšukkaisista.

Muhahuš -šyyšlomaleirin järještäjinä oltih Karjalan Kielen Šeura ta Pohjois-Viena Šeura. Leirin ohjuajana oli Irma Aleksejeva.

Kalittoja ta marjapiiraita
Kuvašša: Lapšet luajittih šuolataikinašta kalittoja ta marjapiiraita. 

Teksti: Irma Aleksejeva
Kuvat: Heini Karjalainen

Vastaa

Sähköpostiosoitettasi ei julkaista. Pakolliset kentät on merkitty *