Muailma, kumbaista ei ollun -ozuttelu Kanzallismuzeissa

Kanzallismuzeissa Helsingissä on avattu Keski- da Suvi-Amerikan muinozie korgiekulttuuroi koskija Muailma, kumbaista ei ollun -ozuttelu.

Nenga 2500 eaa. – 1500 jaa. Keski- da Suvi-Amerikassa elettih omien taboin da neroloin kera kanzat, kumbazista Europassa ei tiijetty nimidä. Nämä kanzat srojittih suurie suarnallizie linnoi, hallittih omie valdakundie da luajittih eriluaduzie čomie ezinehie. Konza europpalazet tuldih uuvella manderella, hyö löyvettih kogonazen uuven muailman, kumbaista heilä ei aijombah ollun olemassa.

Europpalazet vallottajat ruattih uuven manderen rahvahilla äijän pahua, da nygöin näijen rahvahien kulttuuroi ei enämbiä ole. Yhelläh voimma tuttavustuo niih da aigah ennen vallottajie rahvahilda jiänyzien alguperäzien ezinehien kautti. Ozuttelussa on 200 ezinehtä, kumbazien joukossa on ezimerkiksi ašteida, paččahie, nerokkahašti luajittuloi kuldaezinehie da muinozien rahvahien tärgeinä piettylöi tekstiil’oi.

Ennen vallottajien aigua luajittuloi ezinehie da rakennuksie da lazerah perustujan LiDAR-tehniekan avulla kai täh suaten tundemattomie linnoigi löyvetäh nygöin liziä. Niin i suuri kuva Keski- da Suvi-Amerikan muinozista kulttuuroista muuttuu kaiken aigua tarkemmaksi.

Latinalazen Amerikan tutkimuksen dosentan Harri Kettusen mugah tärgeimmät löyvöt tutkimuksessa yhelläh liitytäh nygöin kirjutussistiemoih.

– Aivin konza löyvetäh uuzie tekstoi, suahah enämbi tieduo siidä, midä nämä inehmizet iče ajateldih omistah dieloloista.

A männyzien aigoin kulttuuroin perindö iellähgi eläy Suvi- da Keski-Amerikan rahvahien kessessä.

– Se moničči vain unohtuu. Midä perindehellizembäh tabah yhteizö eläy, sidä enämbi heilä on jällellä dieloloi, kumbazet nävytäh rištikanzoin ajatuksissa, ideologieloissa, mifologieloissa da uskomuksissa, sanou Kettunen.

Muailma, kumbaista ei ollun -ozuttelu on avoin 18.10.2019 – 15.3.2020.

Muailma kumbaista ei ollun

Kiännös: Katerina Paalamo
Kuva: Pixabay
Lähtehet:
https://www.kansallismuseo.fi/fi/naeyttelyt/maailma-jota-ei-ollut
https://yle.fi/uutiset/3-11024951

Vastaa

Sähköpostiosoitettasi ei julkaista. Pakolliset kentät on merkitty *