Hyvittelyt!

ruusunen

Redaktsii hyvittelöy Laurii roindupäivänke! Ozua da lykkyy!

Nuori briha vie

Muga.
Tänäpäi minule täydyy
jo 30 vuottu.

Vaste vai 30 vuottu.

” – Mies täyttää pyöreitä vuosia”, nengalei
myö suomelazet sanommo.

Nuori briha vie, sanotah äijät,
da tiijänhäi minä sen ičegi.

Midä kaikkie olengi nähnyh!?
Midä kaikkie kuulluh täh päiväh suate?
Mittumien ristikanzoin kel vastavunnuh!
Mih kaikkeh olen suannuh opastuo?
Mih kaikkeh minul on puuttunuh opastuo?

Kai net tundehet, da varavot da ozan päivät
da ebäilykset da vuotandat da atkalat, da…
Kai net kaimavot.
Kai net päivät da yöt.

Nuori briha vie.

Kai net taloit da fatierat,
kudamis on ainos pidänyh myöstyö
järilleh omah kodih.

Kai net viinubutilkat da piivokruuskazet,
(kudamien yhtehizel hinnal Suomen valdivo
vois toinah ostua Ven’an Federatsielpäi
kogo vahnan Räisälän voulostin?).

Jogahine niilöis viizahis
da ylen čomis naizis, ket ollah
oldu minun syväindy da hibjuu lähäl –
da kudamat nygöi ollah kustahto muijal:
Minna, Eve, Mari, Elisa, Johanna, Oona –
da tiettäväine Häi, Minun Kuldaine, kudai huomeigi
istuu minun yskäs, kudamua suan ukkailla…
da kudai huomenenjälles
tuaste lähtöy iäre.

Kai muuzikku da pajot, kudamii olen suannuh kuulta!
Kai muuzikku da pajot, kudamii en vie ole suannuh kuulta!

Setämä kniigu, kudaman olen lugenuh.

Nuori briha vie.

Kai net kaimavot…
mollembat died’oit: toizel ilmal.
Muaman muamo: toizel ilmal.
Muamo: toizel ilmal.
Äijät toizetgi rodn’at: toizel ilmal.
Erähät minun dovarišat:
hyögi sie toizel ilmal.
En tiijä, en malta sanuo varmah
ongo minul mahto
vastavuo heijän kaikkien kel
silloi konzu iče lähten tuonilmazih.

Nuori briha vie.

Varmah sanon:
tiijän valgien da pimien väit.
Tiijän, ku jälgimäine praudu
voi toiččinah löydyy bumuagan tekstas.
Tiijän, mittuine on čoma tyttö
da tiijän, ken häi on.
Duumaičen, ku tiijän midä on suvaičus.
Tiijän, kuspäi Suomie Kondiilahti sijaiččou.
Tiijän, ku minun eloksen dorogal
on iespäi kaikenmostu pahua da hyviä,
gor’ua da ozua.

Tiijän, ku olen nuori briha vie.

Lauri Luukkonen

Vastaa

Sähköpostiosoitettasi ei julkaista. Pakolliset kentät on merkitty *