Sulakuun tankarunoloi

    riita

Muga tuhmasti
ruavoin, ga en enämbiä
tahtos torata.
Mikse myö vie kižuammo
ku vällillizet lapset?

****

rakkaus5

Astiet vuotetah
kuhn’as, sovatgi pidäs
pestä da luadie
tuli kylynpäččih – ga
mieles on vaiku sinä.

****

rakkaus3

Väzyttäy ainos
vai puaksumbah ruavos,
gost’is, tiä koisgi.
Läžin voimattomuttu.
Sen nimi on suvaičus.

****

rakkaus2

Duumaičen, suango
nikonzu nähtä sinuu
kuudamanvallos
vahnan kezämökkizen
randuteloil istumas?

****

kevätilta1

Ei kuudamua, ei
tiähtilöi tänäpäi yöl
nävy taivahal.
Yksinäzyös ymbäri
sinizenharmai ilmu.

****

kevät2

Kenbo ellendäs
tädä minun elostu?
En ni iče sua
sidä ellendiä. Tiijän
vaiku sen, što on kevät.

****

rakkaus4

Myös vastavuimmo
jälgimäi! Kahtentostu
vuvven jälgeh, myö!
Da sit lähtimmö tuaste
omile dorogoile…

****

rakkaus1

Tahton sevätä
sinuu vie yhten lyhyön
minuutan aijan.
Ukkailla sinun huulii.
Sanuo net kolme sanua.

****

Lauri Luukkonen

Fotokuvat: Pixabay

Vastaa

Sähköpostiosoitettasi ei julkaista. Pakolliset kentät on merkitty *