Parlamenttivaalit Šuomešša

Parlamenttivaalit

Šulakuun 14. päivänä Šuomešša pietäh parlamenttivaalit. Iäneštämäššä voipi käyvä jokahini Šuomen kanšalaini, kumpani täyttäy 18 vuotta viimeistäh vaalipäivänä.

Jokahini, kellä on iänioikeuš, on šuanun kirjasen. Šiinä kirjasešša on tietuo iäneššyšpaikoista, kumpasie löytyy kauppakeškukšista, kirjaštoista, poštiloista, koululoista tni.  Vaalipäivänä iäneššyšpaikat ollah auki kello 9–20 välisenä aikana. Iččenäh vaalipäivänä (14.4.2019) šuapi käyvä iäneštämäššä vain šillä iäneššyšpaikalla, mi on mainittu kirjasešša. Omašta iäneššyšpaikašta voipi tiijuššellaki šoittamalla täh telefoninumeroh: 0800 9 4770.

Lähtiessä iäneššyšpaikalla pitäy ottua henkilötovissuš, missä on valiččijan valokuva. Henkilötovissuš näytetäh vaalikomiisin ruatajalla iäneššyšpaikalla. Hiän eččiy tullehen valiččijien luvettelošta ta antau hänellä b’ulletenin ta šamallaki merkiččöy, jotta tämä ristikanša on käynyn iäneštämäššä.

Šiitä valiččija mänöy iäneššyškoppih, mistä löytyy kynä ta ehokkahien luvettelo. Šiitä luvettelošta voipi kaččuo ehokkahien numerot. B’ulletenih kirjutetah vain yhen ehokkahan numero. Šen jälkeh kiännetäh b’ulleteni puolekkah niin, jotta še numero ei näkyis. Šiitä b’ulletenin kera männäh vaaliuurnašta vaštuajan virkamiehen luo. Hiän panou leiman b’ulletenih. Šen jälkeh  b’ulleteni lašetah vaaliurnah.

Ne, ket ei piäššä tulomah omalla iäneššyšpaikalla šulakuun 14. päivänä, voijah iäneštyä šitä ennein 9. šulakuuh šuate. Šuomen ulkopuolella eläjät šuomelaiset iäneššettih aikasempah, 3.- 6. šulakuuta.

Kevyän 2019 parlamenttivaalija varoin internettih on luajittu saittija, kumpaset autetah ehokkahan valinnašša. Šemmosie saittija nimitetäh vaalikonehiksi. Näillä saittiloilla kaikki halukkahat voijah vaššata erilaisih kyšymykših. Kyšelyn lopušša saitti näyttäy ehokkahan, kumpani vaštasi šamanmoisih kyšymykših melkein šamoin. Näin ruatau šuurin oša vaalikonehista. Helsingin Sanomat -lehen luatima vaalikoneh ruatau vähän toiseh tapah. Še ei ehota vaštuajan valintojen peruštehella tiettyö ehokašta, a ehottau puoluvehta.

Lisätietuo vaaliloista löytyy saitilta www.vaalit.fi. Šieltä voit lukie iänioikeuvešta, vaalipiirilöistä, tulokšien lašennašta.

Teksti: Irma Aleksejeva
Kuva: Hanne Salonen, Šuomen parlamentti

Vastaa

Sähköpostiosoitettasi ei julkaista. Pakolliset kentät on merkitty *