Vuvven 2019 Karjalaine kalenduaru on piässyh ilmah

Karjalan Kielen Seuran jullatun Karjalazen kalenduaran tiemannu vuvvennu 2019 on karjalaine taido. Kalenduaran runot on kirjutannuh Lauri Luukkonen da kuvitukset luadinuh Toni T. Timonen.

Karjalaine kalenduaru 2019

”Olen suomelaine ta karjalkko, a en suomekko”, tovendau kalenduaran kuvitukset luadinuh Toni T. Timonen. Vuvvennu 1990 Nurmekses rodivunnuon Timozen monipuolizeh tuotandoh kuuluu paiči muudu karjalankielisty sarjukuvataiduo da mangua. Hänen karjalan kielen suvikarjalan murdehel kirjutettuloi tiedokoneh- da konsolikižarvosteluloi on jullattu sežo Karjal Žurnualas. Omis tevoksis Timonen tahtos andua karjalan kielele da karjalazile nygözen päivän da tulien aijan imidžua, ga hänel löydyy sežo äijy karjalazien histourieh liittyjiä tevostu.

Toni T. Timosen Meččyniekan Syväin -blogua piäzet lugemah adresis: http://metsastajan-sydan.blogspot.com/
Timosen Sarjičča-ateljie Kuutamon Facebook-sivuloih voit tuttavuo adresis: https://www.facebook.com/ateljiekuutamo/
da hänen taidoh adresis: https://www.deviantart.com/tonitimonen

Lauri Luukkonen (rodivunnuh 1989) on Päivänlasku-Suomes eläi huaveilii, kudai silloi-toiči kirjuttau runoloi karjalakse. Terväh Karjalan Kielen Seuru julguau Lauri Luukkozen runokirjan Kormanih unohtunnuh suvaičus.

Kalenduaran kielentarkastandan da pruazniekoin nimien kiännökset on luadinnuh Natalia Giloeva.

Kalenduaran tiluamizet seuran  verkolaukaspäi: http://www.karjal.fi/kks/shop/
libo Jovensuun toimistos: tel.+358-44 500 2215/ kirsti.karhinen@karjal.fi.

Terveh tulgua karjalazen runohuon da sarjukuvataijon muailmah!

Vastaa

Sähköpostiosoitettasi ei julkaista. Pakolliset kentät on merkitty *