Tovellizet tundemattomat saldatat oldih muahmuuttajat – Suomen puoles tapettih frontal enämbän ulgomualastu, migu on tietty

ulkomaalainen sotilas
Alahan keskel on Osman Abdrahim, tatuaru kudai sluuzii muun keskes Karjalankannaksel, Syväril da Mikkelis

Suomes eli toizen muailmanvoinan aigua lähtehes rippujen 7000 – 14 000 ulgomualastu. Enimät heis oldih Nevvostoliiton libo Baltien mualoin kanzalazii.

Heijän ozanottuo Suomen voinih on huomavoittu vaiku vähäzel, sanou Suomen muahmuuttamizen histourieh tunnustunnuh Antero Leitzinger. Häi on valdivotiedoloin douhturu da Muahmuuttovirraston tutkii.

‒ Muahmuuttajii on olluh Suomes hätken, da heijän merkičys kaikil aloil on suurembi, kui duumaijah. Tämä koskehes sežo voinua, Leitzinger sanou.

Leitzingeran mugah Suomen iččenäzyön puoles vojuinnuzii ulgomualazii tapettih frontal tiettyy enämbi. Suomes alallizeh elänyzien ulgomualaizen saldattoin rahvahallizuksii registriiruittih allun perin viäräh saldatois luajittuloih kandukartiloih. Heijät sit pandih suomelazikse.

Enne kaikkie nevvostoliittolastu da estounielastu kuoli enämbi migu virrallizet tiijot sanellah, on sellitännyh Leitzinger.

Voinan jälgeh dielos vaikastuttih nakazaanien varavon täh Leitzinger sanou.

‒ Ruoččilazis omatahtozis paistih, ga nevvostoliittolazis ei. Heidy varaitti luovutandu järilleh rajan tuakse. Kuului tyhjiä paginua, ku voinah yhtynyöt otetah kiinni Viiburin junas da kuaznitah libo työtäh Siberih.

Kanzallisarhiivan sodasurmutiedokannan mugah Suomen voinis 1939‒1945 kuoli 367 ulgomualoin kanzalastu libo omal kanzallizuol tundemattomua saldattua kaikkiedah yheksäs eri kanzallizuos.

‒ Luvettelo on vajanaine. Frontal tapettuloi ulgomualazii tovennägözeh on olluh 500 – 600, arvivoi Leitzinger.

Hänen oman sellityksen tulos tässäh on 441 nimie.  Valduoza miehis lähti sodah omatahtozeh, konzu voinanaigah armiivellallizus koskihes enimyölleh vaiku suomelazii.

‒ Yksittäzii armiivellallizikse sanomizii julgi tietäh, ga ozutahes, ku net olis luajttu kenentah omas pakičukses.

Lähte: Janne Laitinen, Karjalainen

Fotokuva: Karjalainen.

 

Vastaa

Sähköpostiosoitettasi ei julkaista. Pakolliset kentät on merkitty *