Vakustaugo zakon libo viralline stuatussu kielivähembistön myödymielizen kehityksen?

Mieli

1024px-Helsinki_July_2013-21Ven’an Karjalas  parahite paistah karjalan kielen virallizen stuatusan järjestämizes. Se olis putin askel edehpäi, ga ilmai muuloi toimenpidoloi se ei yhtelläh piätä nimidä. Ruočis zakon rahvahallizis vähembistökielis tuli voimah jo vuvven 2010 allus, ga Suomen kielen stuatussu on zakonas huolimattah ainos vie huono da se on daže erähil ozin huononnuh. Toizis Europan mualois on sežo luajittu rahvahallizii vähembistölöi suojelijoi da niilöin kielien da kul’tuuroin elvyttämisty helpondajii zakonoi, ga enimis mualois kehitys on kiändynyh positiivizeh suundah. Mis tämä roih? Niilöis mualois ei uskota vaiku zakonoin kaikenvaldazuoh, vai vähembistöt iče ollah ylen aktiivizet. Meil Suomesgi on ezimerkilöi sit, ku luottamine virguniekkoin johtettuloih nevvottelukundih, kudamat buiteku pietäh huoldu vähembistölöin dielolois, on ozutannuhes viäräkse. Paras ezimerki on čigandieloloin nevvottelukundu. Čiganoin dieloloin hoidamizen ulgostamine nevvottelukunnale ei ole ozavunnuh.
Erähät karjalazet kieliaktivistatgi sogieh uskotah zakonoin voimah da KKS:le on puaksuh ezitetty karjalan kielen nevvottelukunnan perustamistu. Duumua ei seuras ole kannatettu, konzu karjalankielizien paras evunkaččoi on tiettäväine seuru iče. Virguniekut voijah kannattua vähembistölöin kielen da kul’tuuran elvyttämisty dai kehittämisty, ga hyö ei voija ruadua ihangi muudu. Vähembistöl myös pidäy enne kaikkie luobuo mennyzyöh tuijotandas, kudamua edustau muga sanottu etnokul’tuuruzus. Karjalazile pidäy tarita nygyaigaine identitiettu da kul’tuuru. Karjalan kieles pidäy kehittiä nygösty parembi käyttökieli perehis, yhtistyksis, taijos, karjalazes meedies da somes. Täh ku piästäs pidäy panna varoi opastandah da kreatiivizeh toimindah kaikil tazoloil. Kaikes täs karjalan kielen kehittämine on piäpozitsies. Meedien ližäkse uvvel karjalankielizet kirjallizuol dai muuloin taijon aloil on piärouli. Ihan täh KKS on jälgimäzinny vuozinnu pannuh varoi da toimindua vaiku lizätäh elvytysohjelman algamizen avul.
Kielivähembistön tulevazuon voi luadie vaiku vähembistö iče!
Pertti Lampi
Fotokuva: Wikipedii

 

Vastaa

Sähköpostiosoitettasi ei julkaista. Pakolliset kentät on merkitty *