Perehis on roinnuh tahto ližätä kielen käyttyö kielipezän avavuu

Oraskuun allus Karjalan kielen kois piettih seminuarua kielipezäh näh. Sih yhtyi mm. kielipezälapsien vahnembii da pruavovahnembii. Seminuaral šeikuittih kielipezäh liittyjiä dieluo, kielipezämetoudan hyödylöi da kielipezän tuliedu aigua. Vieljärven kielipezä algoi ruavon sulakuun allus da ezmäi pietäh kolmen kuun eksperimentu. Kezän jälles huavatah kielipezäpäiviä pitkendiä jo kogonazekse ruadopäiväkse. Nygöi lapsii tuvvah kielipezäh huondeksel kaheksan puoli yheksän aigua. Huondesvero on yheksäl čuasul. Päivän aloh on kaikenmostu hommua, kižuandua, pihalolendua da murgin. Sit puoli kahtessah lapsii otetah iäres kodih. Kielipezä ruadau Karjalan kielen koin yhtistyksen ual.

Toizet kielipezän lapsis ollah karjalazis perehis, yhten perehen muamo on amerikkalaine da tuatto ven’alaine. Joga perehes pruavovahnembat paistah karjalakse, no ei bunukoile, ga perehis on roinnuh tahto ližätä kielen käyttyö kielipezän avavuu. Enimil kielipezälapsien vahnembil ei ole karjalan kielen maltuo, voibi olla ellendetäh, no iče ei paista. Tiettäväine kielen omaksumine lapsele roih teriämbi, ku häi suas kuulta sidä kielipezän ulgopuolelgi – omas kois, buaballuo libo died’oilluo.

Kielipezäs lapset harjavutah kieleh kuunnelten da käyttäjen sidä jogapäiväzis hommis. Vieljärven kielipezäl on kirjutettu oma ”kielipezän ruadajan morali”, kudai sanelou midä kielipezän kazvattajal pidäy. Sit on kirjutettu kielipezän kazvattajal pidäy tiediä mm. lapsehkoidujat oigevukset da vällyöt, karjalan kielen da karjalazien kanzallizen kul’tuuran da Ven’an Federatsien lapsienkazvatandan opastusstandartoin perustan. Vie paiči karjalan kielen maltuo kielipezän kazvattajal pidäy tiediä kielipezämetoudu, olla hyvin lapsienke, paista lapsienke vaiku karjalakse kui kielipezäs mugai sen ulgopuolel, eigo verdailla lapsien suavutuksii.

Vieljärven kielipezäl on oma sivu vkontaktes. Palazii kielipezän päiväs voibi kaččuo Youtubes.

Vastaa

Sähköpostiosoitettasi ei julkaista. Pakolliset kentät on merkitty *