Karjalan Kielen Seuru luadiu omassah evunkačondua tevokkahembakse Europan Nevvoston tuvel

Seuran vuozikerähmö piettih egläi 18.5.2017 Helsingis. Kerähmös iloiltihes Europan Nevvoston tuves Suomen karjalankielizile da piätettih jatkua soviettoi virguniekkoinke endisty innokkahembah.
Europan Nevvoston ministrukomitiettu näit ku ei muga ammui sanoi omassah mielen Suomen karjalankielizen vähembistön puoles. Kannatuksen mugah karjalankielizii pidäs pidiä muga kui muuloigi meijän muan rahvahallizii vähembistölöi. Nämät vähembistöt ollah ruočinkielizet, saamilazet, čiganat, ven’ankielizet, tatuarat, juudalazet da karjalankielizet. Komitietan mugah sežo estounielazet ollah rahvahalline vähembistö Suomes.
Suomen kodiperäzet kielet ollah suomi, saami da karjalan kieli. Täs huolimattah da hos karjalakse on paistu nygözengi Suomen alovehel jo yli tuhat vuottu, kielen stuatussu on olluh da on ielleh ihan hondo kogo suomelazes yhteiskunnas. Virguniekat ei olla ihan ni yhty huomavoitu kieldy. Vuvvennu 2009 luajitun azetesmuutoksen jälles tilandeh on vähäzel kohendunnuh, ga ei ni vouse meijän muan hyväksyttylöin Europan Nevvoston da YK:n sobimuksien mugazekse. Ezim. karjalan opastamine perusškolis on valdivon da kundien opastusvirguniekkoin toimes luajittu toven vaigiekse. Luadivosyynny on käytetty sidä, ku konstitutsies ei mainita karjalua. Yhtelläh monii muahmuuttajien kielii, kudamii sežo ei mainita, voijah virguniekkoin sellitändän mugah opastua školis, ga karjalua ei.
KKS algau järgieh uuzii soviettoi karjalankielizien tilandehen kohendamizekse. Europan Nevvoston tuven ližäkse abuu on luvas suuril europpalazil vähembistökieliorganizatsieloilpäi.
Vuozikerähmödokumentoin hyväksyndäh ližäkse kerähmös oldih nägyvil sežo hengilövalličukset. Arhijepiskoppu Leo vallittih myös paginanvedäjäkse. Erovuoros olluot halličuksen jäzenet Hannu Kilpeläinen da Pertti Lampi vallittih uvvessah halličukseh kolmekse vuvvekse. Uvvekse halličuksen jäzenekse vallittih Ritva Lampivuo. Seuran tärgevin ruado tämän vuvven aigua on panna alguh karjalan kielen da kul’tuuran elävytändyohjelmu. Täh niškoi parluamentu andoi seurale 100 000 euron miärydengan, kudai jälgimäi suadaneh käyttöh kezäkuul.
Pertti Lampi, sekretari
Lähte: KKS:n lehtistötiijoitus

Vastaa

Sähköpostiosoitettasi ei julkaista. Pakolliset kentät on merkitty *