Baskin kielekse pagizijoin miäry on merkiččijäh ližävynnyh

800px-Vitoria_blanca2Baskimual ei nikonzu ole olluh muga äijy kahtekse kielekse pagizijua. Tämä on eräs piättävimis kuvvennen sotsiolingvistiekallizen tutkindan tuloksis, kudaman julgai Baskimuan halličus. Viimezimien (2016) luguloin mugah 33,9 % Baskimuan yli 16-vuodizis eläjis sanotah varmah, ku hyö ollah baskin kielekse pagizijat (631,000 ristikanzua), 19,1 % (356,000) sanotah varmah, ku hyö ollah passiivizet pagizijat (hyö ellendetäh, ga ei paista hyvin kieldy) da dostalit 47 % (877,000) ei paista baskin kielekse libo ellendetä sidä. ”Nämät ollah merkiččijät luvut. Baskin kielekse hyvin pagizijoi on 212 000 enämbän kui vuvvennu 1991”, ilmoitti Patxi Baztarrika, Baskimuan kielipoliitiekan varaministru da NPLD:n paginanvedäi.
Yksi mieldykiinnittävimis muutoksis Baskin kielen eloivoimas on nuorien pagizijoin kazvai miäry. Vuvvennu 1991 vaiku 25 % 16‒24-vuodizis baskimualazis sanottih varmah, ku hyö paistah baskin kielekse. Tänäpäi lugu on ylen terväzeh nossuh 71,4 %. ”Nämät luvut ebäilemättä innostetah meidy. Tämä on kogo Baskimuan suavutus”, Baztarrika sanoi, ”ga meil pidäy ruadua ainosgi muga hyvin kui olemmo täh suate ruadanuh”.
Lähte: NPLD
Fotokuva: Wikipedii

Vastaa

Sähköpostiosoitettasi ei julkaista. Pakolliset kentät on merkitty *